സിറിയയിൽ വച്ച് ഹിസ്ബുല്ലയുടെ ധനകാര്യ വിഭാഗം മേധാവിയെ കൊലപ്പെടുത്തിയതായി ഇസ്രയേൽ സൈന്യം അറിയിച്ചു. കൊല്ലപ്പെട്ടയാളുടെ പേര് ഇസ്രയേൽ വെളിപ്പെടുത്തിയിട്ടില്ല. എന്നാൽ, ഇദ്ദേഹം ഹിസ്ബുല്ലയുടെ യൂണിറ്റ് 4400 എന്ന വിഭാഗത്തിൻ്റെ കമാൻഡറായിരുന്നുവെന്നും ഹിസ്ബുല്ലയുടെ ധനകാര്യ വിഭാഗത്തിൻ്റെ ചുമതല വഹിച്ചിരുന്നുവെന്നും ഇസ്രയേൽ സൈന്യം പുറത്തുവിട്ട വാർത്താക്കുറിപ്പിൽ വ്യക്തമാക്കി.
നേരത്തെ ഈ യൂണിറ്റിനെ നയിച്ചിരുന്നത് ഷെയ്ഖ് സലാഹ് എന്നറിയപ്പെട്ടിരുന്ന മൊഹമ്മദ് ജാഫർ കസിറായിരുന്നു. ഇറാൻ്റെ പിന്തുണയുള്ള ഹിസ്ബുല്ലയുടെ ഫണ്ട് ദീർഘകാലം ഇദ്ദേഹവും സംഘവുമാണ് കൈകാര്യം ചെയ്തിരുന്നത്. ഒക്ടോബർ ആദ്യവാരം ബെയ്റൂത്തിൽ നടത്തിയ ആക്രമണത്തിൽ ഇദ്ദേഹത്തെ ഇസ്രയേൽ വധിച്ചതിനെ തുടർന്നാണ് പുതിയ കമ്മാൻഡർ ചുമതലയേറ്റത്.
ഇന്നലെ ദമാസ്കസിൽ കാറിന് നേരെ ഇസ്രയേൽ നടത്തിയ ആക്രമണത്തിൽ രണ്ട് പേർ കൊല്ലപ്പെട്ടതായി സിറിയ നേരത്തെ വ്യക്തമാക്കിയിരുന്നു. ഹമാസ് നേതാവായിരുന്ന യഹ്യ സിൻവറിൻ്റെ മരണത്തിൽ അനുശോചിക്കാൻ ചേർന്ന ഒരു യോഗത്തിനിടയിലാണ് ഈ ആക്രമണം നടന്നത്. ഇറാനിൽ നിന്ന് സിറിയയിലേക്ക് ഇന്ധനം എത്തിച്ച് ലെബനന് വിൽക്കുന്ന ചുമതലയാണ് യൂണിറ്റ് 4400 ൻ്റേതെന്നും റിപ്പോർട്ടുകൾ സൂചിപ്പിക്കുന്നു.
Story Highlights: Israeli army claims to have killed Hezbollah finance chief in Syria, escalating tensions in the region.
