ഉരുൾപൊട്ടൽ ദുരിതബാധിതർക്ക് താത്കാലിക വീടുകൾ നൽകാൻ സന്നദ്ധരായവർ വിവരം അറിയിക്കണം: ജില്ലാ കളക്ടർ

വയനാട് ജില്ലയിൽ ഉരുൾപൊട്ടലിൽ വീട് നഷ്ടപ്പെട്ടവർക്ക് താത്കാലിക പുനരധിവാസത്തിനായി വീടുകൾ വാടകയ്ക്ക് നൽകാൻ സന്നദ്ധരായവർ വിവരം അറിയിക്കണമെന്ന് ജില്ലാ കളക്ടർ ഡി.ആർ മേഘശ്രീ അഭ്യർത്ഥിച്ചു. സ്ഥിരം സംവിധാനം ഒരുങ്ങുന്നതുവരെയാണ് ഈ താത്കാലിക സൗകര്യം ആവശ്യമെന്നും അവർ വ്യക്തമാക്കി. പ്രതിമാസം 6000 രൂപ സർക്കാർ വാടകയായി അനുവദിക്കുമെന്നും കളക്ടർ അറിയിച്ചു.

മുട്ടിൽ, മേപ്പാടി, വൈത്തിരി, അമ്പലവയൽ, മൂപ്പൈനാട്, പൊഴുതന, വേങ്ങപ്പള്ളി, മീനങ്ങാടി എന്നീ ഗ്രാമപഞ്ചായത്തുകളിലും കൽപ്പറ്റ നഗരസഭാ പരിധിയിലുമാണ് നിലവിൽ വീടുകൾ അന്വേഷിക്കുന്നത്. വീടുകൾ, വീടുകളുടെ മുകൾ നിലകൾ, ഒറ്റമുറികൾ, ഹൗസിങ് കോളനികൾ, മതസ്ഥാപന പരിധിയിലുള്ള കെട്ടിടങ്ങൾ തുടങ്ങിയവയാണ് താത്കാലിക താമസത്തിന് ആവശ്യമായത്. ദുരന്ത ബാധിതരെ വീടുകളിൽ അതിഥികളായും സ്വീകരിക്കാമെന്ന് കളക്ടർ അറിയിച്ചു.

ക്യാമ്പുകളിൽ കഴിയുന്നവരുടെ താത്കാലിക പുനരധിവാസം ഓഗസ്റ്റ് മാസം തന്നെ ഉറപ്പാക്കാൻ എല്ലാവരുടെയും സഹകരണം ആവശ്യമാണെന്ന് ജില്ലാ കളക്ടർ അഭ്യർത്ഥിച്ചു. കൂടുതൽ വിവരങ്ങൾക്ക് 9526804151, 8078409770 എന്നീ നമ്പറുകളിൽ ബന്ധപ്പെടാവുന്നതാണ്. ദുരിതബാധിതർക്ക് സഹായഹസ്തം നീട്ടാൻ സന്നദ്ധരായവർ മുന്നോട്ട് വരണമെന്ന് കളക്ടർ അഭ്യർത്ഥിച്ചു.

Story Highlights: Wayanad District Collector seeks temporary housing for landslide victims