ഹരിയാന നിയമസഭാ തെരഞ്ഞെടുപ്പ് തീയതിയില്‍ മാറ്റം വരുത്തിയതായി കേന്ദ്ര തെരഞ്ഞെടുപ്പ് കമ്മീഷന്‍ അറിയിച്ചു. നേരത്തെ ഒക്ടോബര്‍ ഒന്നിനായിരുന്നു തെരഞ്ഞെടുപ്പ് നടത്താന്‍ തീരുമാനിച്ചിരുന്നത്. എന്നാല്‍ ഇപ്പോള്‍ ഒക്ടോബര്‍ അഞ്ചാം തീയതിയിലേക്ക് മാറ്റിവെച്ചിരിക്കുകയാണ്. ഒറ്റഘട്ടമായാണ് ഹരിയാനയില്‍ നിയമസഭാ തെരഞ്ഞെടുപ്പ് നടക്കുക.
തെരഞ്ഞെടുപ്പ് ഫലം പ്രഖ്യാപിക്കുന്ന തീയതിയിലും മാറ്റം വന്നിട്ടുണ്ട്. നേരത്തെ ഒക്ടോബര്‍ നാലിനായിരുന്നു ഫലം പ്രഖ്യാപിക്കാന്‍ തീരുമാനിച്ചിരുന്നത്. എന്നാല്‍ ഇപ്പോള്‍ ഒക്ടോബര്‍ എട്ടിനായിരിക്കും ഫലം പ്രഖ്യാപിക്കുക. തെരഞ്ഞെടുപ്പ് തീയതി മാറ്റിയതിനെ തുടര്‍ന്നാണ് ഫലപ്രഖ്യാപന തീയതിയിലും മാറ്റം വന്നത്.
ഹരിയാനയിലെ ബിഷ്ണോയി സമുദായത്തിലെ ആളുകള്‍ക്ക് അവരുടെ ഗുരു ജംഭേശ്വരൻ്റെ സ്മരണാർത്ഥമുള്ള അസോജ് അമാവാസി ആഘോഷത്തില്‍ പങ്കെടുക്കാന്‍ അവസരമൊരുക്കുന്നതിനായാണ് തെരഞ്ഞെടുപ്പ് തീയതി മാറ്റിവെച്ചത്. അതേസമയം, നേരത്തെ ബിജെപി തെരഞ്ഞെടുപ്പ് തീയതി മാറ്റിവെക്കണമെന്ന ആവശ്യവുമായി രംഗത്തെത്തിയിരുന്നു. ഒക്ടോബര്‍ ഒന്നിന് മുമ്പും ശേഷവും അവധി ദിനങ്ങള്‍ വരുന്നതിനാല്‍ പോളിങ് ശതമാനത്തെ ബാധിച്ചേക്കുമെന്ന ആശങ്കയും അവര്‍ ഉന്നയിച്ചിരുന്നു.
Story Highlights: Haryana Assembly election postponed to October 5, results on October 8
