ഹരിയാനയിലെ 90 നിയമസഭാ മണ്ഡലങ്ങളിൽ നാളെ ഒറ്റ ഘട്ടമായി തെരഞ്ഞെടുപ്പ് നടക്കും. രാവിലെ 7 മണി മുതൽ 20,629 പോളിംഗ് ബൂത്തുകളിൽ വോട്ടെടുപ്പ് ആരംഭിക്കും. മൂന്നാം തവണയും അധികാരം നിലനിർത്താൻ ശ്രമിക്കുന്ന ബിജെപിയും പത്തുവർഷത്തിനുശേഷം ഭരണം തിരിച്ചുപിടിക്കാൻ ശ്രമിക്കുന്ന കോൺഗ്രസും തമ്മിലാണ് പ്രധാന മത്സരം.
ശക്തമായ ഭരണവിരുദ്ധ വികാരം നിലനിൽക്കുന്ന സംസ്ഥാനത്ത് ബിജെപി കടുത്ത ആശങ്കയിലാണ്. കർഷക വിരുദ്ധ നടപടികൾ, ഗുസ്തി പ്രതിഷേധം, ജാതി സെൻസസ് തുടങ്ങിയ വിഷയങ്ങൾ ഉയർത്തി കോൺഗ്രസ് വോട്ടർമാരെ സമീപിക്കുന്നു. ജാട്ട് സമുദായത്തിന്റെ വോട്ടുകൾ നിർണായകമായ ഹരിയാനയിൽ, മുഖ്യമന്ത്രി മനോഹർ ലാൽ ഖട്ടറിനെ മാറ്റിയപ്പോൾ ജാട്ട് വിഭാഗത്തിൽ നിന്ന് പുതിയ മുഖ്യമന്ത്രിയെ കൊണ്ടുവരാതിരുന്നത് അതൃപ്തിക്ക് കാരണമായി.
ജാട്ട് വിഭാഗങ്ങൾക്കൊപ്പം ന്യൂനപക്ഷ വോട്ടുകളിലും കോൺഗ്രസ് പ്രതീക്ഷ അർപ്പിക്കുന്നു. ഒറ്റയ്ക്ക് മത്സരിക്കുന്ന ജെജെപി, ആം ആദ്മി പാർട്ടി എന്നിവർ കോൺഗ്രസ്-ബിജെപി വോട്ടുകളിൽ കടന്നുചെന്നാൽ ഇരുകൂട്ടർക്കും കടുത്ത വെല്ലുവിളിയാകും. നിശബ്ദ പ്രചാരണ ദിവസമായ ഇന്ന് പരമാവധി വോട്ടുകൾ ഉറപ്പിക്കാനുള്ള നീക്കത്തിലാണ് എല്ലാ മുന്നണികളും.
Story Highlights: Haryana assembly elections set for tomorrow with BJP and Congress in tight race
