സ്വർണവില തുടർച്ചയായ രണ്ടാം ദിവസവും സർവകാല റെക്കോഡ് തിരുത്തി. ഇന്ന് ഒരു പവൻ സ്വർണത്തിന് 160 രൂപ വർധിച്ച് 56,000 രൂപയിലെത്തി. ഒരു ഗ്രാം സ്വർണത്തിന് 20 രൂപ കൂടി 7,000 രൂപയായി. ഈ മാസം മാത്രം ഒരു പവന് 2,640 രൂപയാണ് വർധിച്ചത്.
കഴിഞ്ഞ വർഷം സെപ്റ്റംബർ 24-ന് ഒരു പവൻ സ്വർണത്തിന് 43,960 രൂപയായിരുന്നു വില. ഒരു വർഷം കൊണ്ട് 12,040 രൂപയാണ് വർധിച്ചത്. അമേരിക്കൻ ഫെഡറൽ റിസർവ് പലിശ നിരക്കിൽ അര ശതമാനം കുറച്ചതോടെയാണ് സ്വർണ വിലക്കയറ്റം തുടങ്ങിയത്.
പശ്ചിമേഷ്യയിൽ സംഘർഷം വർധിച്ചതോടെ മറ്റ് നിക്ഷേപങ്ങളേക്കാൾ സുരക്ഷിതമാണെന്ന തോന്നലിൽ നിക്ഷേപകർ സ്വർണത്തിലേക്ക് തിരിയുന്നത് ഡിമാൻഡ് വൻ തോതിൽ വർധിപ്പിക്കുകയാണ്. ഇതാണ് വില പിടിച്ചാൽ കിട്ടാത്ത ഉയരത്തിലേക്ക് പോകാൻ കാരണം. സ്വർണവിലയിലെ ഈ വർധനവ് നിക്ഷേപകരെയും വിപണിയെയും സാരമായി ബാധിക്കുമെന്ന് വിദഗ്ധർ വിലയിരുത്തുന്നു.
Story Highlights: Gold price hits all-time high for second consecutive day, rising by 160 rupees per sovereign to reach 56,000 rupees
