Gita Gopinath Steps Down as IMF First Deputy MD

രാജ്യാന്തര നാണ്യ നിധിയിലെ (ഐഎംഎഫ്) ഫസ്റ്റ് ഡെപ്യൂട്ടി എംഡി സ്ഥാനത്തുനിന്ന് ഗീതാ ഗോപിനാഥ് പടിയിറങ്ങുന്നു. ഹാർവാഡിലെ സാമ്പത്തിക ശാസ്ത്ര വിഭാഗത്തിൽ ഇനാഗുറൽ ഗ്രിഗറി, അനിയ കോഫെ പ്രൊഫസർ ഓഫ് ഇക്കണോമിക്സ് ആയി അവർ മടങ്ങിയെത്തും. മുൻ റിസർവ് ബാങ്ക് ഗവർണർ ഡോ. രഘുറാം രാജൻ, കൗശിക് ബസു, അഭിജിത് സെൻ, അരവിന്ദ് സുബ്രഹ്മണ്യൻ എന്നിവരുടെ പട്ടികയിലേക്ക് ഇതോടെ ഗീതാ ഗോപിനാഥ് എത്തുകയാണ്. ഐഎംഎഫ് മേധാവി ക്രിസ്റ്റലീന ജോർജീവയാണ് ഗീതാ ഗോപിനാഥിന്റെ രാജി വിവരം അറിയിച്ചത്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഗീതാ ഗോപിനാഥ് മികച്ച സഹപ്രവർത്തകയാണെന്നും അസാധാരണമായ ബൗദ്ധിക ശേഷിയുള്ള നേതാവാണെന്നും ക്രിസ്റ്റലീന ജോർജീവ പ്രസ്താവിച്ചു. ഫണ്ട് വിനിയോഗം, രാജ്യാന്തര സാമ്പത്തിക ശാസ്ത്രം, പ്രൊഫഷണലിസം എന്നിവയിൽ അവർ അനിതരസാധാരണമായ മികവ് പുലർത്തുന്നു. സാമ്പത്തിക പരാധീനതയിൽ പെട്ട അർജന്റീനയ്ക്കും യുദ്ധ ഭീതിയിലാഴ്ന്ന യുക്രെയ്നും ഫണ്ടുകൾ അനുവദിക്കുന്നതിൽ ഗീതാ ഗോപിനാഥ് കാണിച്ച ശ്രദ്ധയെ ജോർജീവ പ്രശംസിച്ചു. ജി 7, ജി 20 പോലെയുള്ള രാജ്യാന്തര കൂട്ടായ്മകളിൽ ഐഎംഎഫിനെ ക്രിയാത്മകമായി പ്രതിനിധീകരിക്കാൻ ഗീതാ ഗോപിനാഥിന് കഴിഞ്ഞിട്ടുണ്ടെന്നും അവർ കൂട്ടിച്ചേർത്തു.

2019-ലാണ് ഗീതാ ഗോപിനാഥ് ഹാർവാഡിലെ അധ്യാപക ജോലിയിൽ നിന്ന് അവധിയെടുത്ത് ഐഎംഎഫിൽ ചീഫ് ഇക്കണോമിസ്റ്റായി ചുമതലയേൽക്കുന്നത്. ഒമ്പത് വർഷമാണ് അവർ ഐഎംഎഫിനൊപ്പം പ്രവർത്തിച്ചത്. ഈ പദവിയിലെത്തുന്ന ആദ്യ വനിതയാണ് ഗീതാ ഗോപിനാഥ്. 2022-ൽ അവർക്ക് ഫസ്റ്റ് ഡെപ്യൂട്ടി എംഡിയായി സ്ഥാനക്കയറ്റം ലഭിച്ചു.

ഗീതാ ഗോപിനാഥിന്റെ രാജി സ്ഥിരീകരിച്ചുകൊണ്ട് എക്സിൽ പോസ്റ്റ് ചെയ്തു. “ആദ്യം ചീഫ് ഇക്കണോമിസ്റ്റായും പിന്നീട് ഫസ്റ്റ് ഡെപ്യൂട്ടി മാനേജിംഗ് ഡയറക്ടറായും ഐഎംഎഫിൽ പ്രവർത്തിക്കാൻ കഴിഞ്ഞതിൽ ഞാൻ വളരെയധികം സന്തോഷവതിയാണ്.” സാമർത്ഥ്യവും പ്രതിബദ്ധതയുമുള്ള ഐഎംഎഫ് ജീവനക്കാർ, മാനേജ്മെൻ്റിലെ സഹപ്രവർത്തകർ, എക്സിക്യൂട്ടീവ് ബോർഡ്, രാജ്യത്തലവന്മാർ എന്നിവരുമായി അടുത്ത് പ്രവർത്തിക്കാൻ അവസരം ലഭിച്ചു.

പകർച്ചവ്യാധി, ഭൗമ രാഷ്ട്രീയ പ്രശ്നങ്ങൾ, ജീവിതച്ചെലവ് പ്രതിസന്ധി, ആഗോള വ്യാപാര മേഖലയിലെ പ്രതിസന്ധി എന്നിവയുടെ കാലത്ത് ഗീതാ ഗോപിനാഥിന്റെ പ്രായോഗിക നയരൂപീകരണം ഐഎംഎഫിന് ഏറെ സഹായകമായി എന്ന് ജോർജീവ അഭിപ്രായപ്പെട്ടു. ആഗോള വെല്ലുവിളികളെ അഭിമുഖീകരിക്കുന്നതിനും അടുത്ത തലമുറയിലെ സാമ്പത്തിക വിദഗ്ധരെ പരിശീലിപ്പിക്കുന്നതിനും അന്താരാഷ്ട്ര ധനകാര്യത്തിലും മാക്രോ ഇക്കണോമിക്സിലും ഗവേഷണ മേഖലയിൽ പുതിയ അതിരുകൾ രചിക്കാൻ അക്കാദമിക് രംഗത്തേക്ക് മടങ്ങുകയാണെന്നും അവർ കൂട്ടിച്ചേർത്തു. അഭൂതപൂർവമായ വെല്ലുവിളികളുടെ ഒരു കാലഘട്ടത്തിൽ ഐഎംഎഫിനെ സേവിക്കാൻ അവസരം ലഭിച്ചതിന് ക്രിസ്റ്റലീനയോടും അവരുടെ മുൻഗാമിയായ ക്രിസ്റ്റീൻ ലഗാർഡെയോടും ഗീതാ ഗോപിനാഥ് നന്ദി അറിയിച്ചു.

കണ്ണൂരിൽ കുടുംബവേരുകളുള്ള ഗീതാ ഗോപിനാഥ് ലേഡി ശ്രീറാം കോളജിൽ നിന്ന് ബിരുദവും ഡൽഹി സ്കൂൾ ഓഫ് ഇക്കണോമിക്സിൽ നിന്നും വാഷിങ്ടൺ യൂണിവേഴ്സിറ്റിയിൽ നിന്നും ബിരുദാനന്തര ബിരുദവും നേടി. അതിനു ശേഷം അമേരിക്കയിലെ പ്രിൻസ്റ്റൺ യൂണിവേഴ്സിറ്റിയിൽ പിഎച്ച്ഡി ചെയ്തു. തുടർന്ന് ചിക്കാഗോ യൂണിവേഴ്സിറ്റിയിലെ ബൂത്ത് സ്കൂൾ ഓഫ് ബിസിനസ്സിൽ അധ്യാപികയായി. അവിടെ നിന്നാണ് ഹാർവാഡിലെത്തുന്നത്. ഫിനാൻഷ്യൽ ടൈംസിൻ്റെ മോസ്റ്റ് ഇൻഫ്ലുവൻഷ്യൽ വിമൻ ഓഫ് 2021 ലും 2019 നിർവചിച്ച 50 പ്രമുഖ വ്യക്തികളുടെ ബ്ലൂംബെർഗ് പട്ടികയിലും വോഗ് ഇന്ത്യയുടെ വിമൻ ഓഫ് ദ ഇയറായും ഗീതാ ഗോപിനാഥ് തിരഞ്ഞെടുക്കപ്പെട്ടിട്ടുണ്ട്.

ഗീതാ ഗോപിനാഥിന്റെ ഈ വാക്കുകൾ പ്രചോദനമുൾക്കൊണ്ട് കൂടുതൽ യുവ സാമ്പത്തിക ശാസ്ത്രജ്ഞർ ആഗോള സമ്പദ് വ്യവസ്ഥയ്ക്ക് കരുത്ത് പകരുമെന്ന് പ്രതീക്ഷിക്കാം.

Story Highlights : Gita Gopinath to step down as IMF’s first deputy MD

Story Highlights: രാജ്യാന്തര നാണ്യ നിധിയിലെ (ഐഎംഎഫ്) ഫസ്റ്റ് ഡെപ്യൂട്ടി എംഡി സ്ഥാനത്തുനിന്ന് ഗീതാ ഗോപിനാഥ് പടിയിറങ്ങുന്നു.