കേന്ദ്ര സർക്കാർ പാകിസ്ഥാൻ നടൻ ഫവാദ് ഖാന്റെ ബോളിവുഡ് ചിത്രം ‘അബിർ ഗുലാൽ’ ഇന്ത്യയിൽ നിരോധിച്ചു. മെയ് 9 ന് റിലീസ് ചെയ്യാൻ തീരുമാനിച്ചിരുന്ന ചിത്രത്തിൽ വാണി കപൂർ ആണ് നായിക. പഹൽഗാം ഭീകരാക്രമണത്തിന്റെ പശ്ചാത്തലത്തിൽ ചിത്രത്തിന്റെ റിലീസ് നീട്ടിവയ്ക്കുന്നത് കുറിച്ച് അണിയറപ്രവർത്തകർ ആലോചിച്ചിരുന്നു. ഈ സാഹചര്യത്തിലാണ് കേന്ദ്ര വാർത്താ വിതരണ പ്രക്ഷേപണ മന്ത്രാലയം ചിത്രത്തിന് വിലക്ക് ഏർപ്പെടുത്തിയത്.
ഒമ്പത് വർഷത്തിന് ശേഷം ഫവാദ് ഖാന്റെ ബോളിവുഡിലേക്കുള്ള തിരിച്ചുവരവായിരുന്നു ‘അബിർ ഗുലാൽ’. ഖൂബ്സുരത് (2014), കപൂർ & സൺസ് (2016), ഏ ദിൽ ഹേ മുഷ്കിൽ (2016) തുടങ്ങിയ ചിത്രങ്ങളിലൂടെ ഇന്ത്യൻ പ്രേക്ഷകർക്കിടയിൽ ശ്രദ്ധേയനായ നടനാണ് ഫവാദ് ഖാൻ. ഭീകരാക്രമണത്തെ അപലപിച്ച് ഫവാദ് ഖാൻ കഴിഞ്ഞ ദിവസം കുറിപ്പ് പങ്കുവെച്ചിരുന്നു.
ചിത്രത്തിലെ രണ്ട് പാട്ടുകൾ നേരത്തെ പുറത്തിറങ്ങിയിരുന്നു. എന്നാൽ, ഭീകരാക്രമണത്തിന് പിന്നാലെ യൂട്യൂബ് ഇന്ത്യയിൽ നിന്ന് ഇരു പാട്ടുകളും അപ്രത്യക്ഷമായി. ഇന്ത്യയിലെ തിയേറ്ററുകളിൽ ചിത്രം റിലീസ് ചെയ്യില്ലെന്ന് കേന്ദ്ര വാർത്താ വിതരണ പ്രക്ഷേപണ മന്ത്രാലയവുമായി അടുത്ത വൃത്തങ്ങൾ വെളിപ്പെടുത്തി.
Story Highlights: The Indian government has banned Fawad Khan’s Bollywood film ‘Abhirr Gulal’.
