CPIM Pathanamthitta Conference: Leadership Dispute Erupts

പത്തനംതിട്ട: സിപിഐഎം പത്തനംതിട്ട ജില്ലാ സമ്മേളനത്തിൽ നേതൃത്വ പ്രാതിനിധ്യത്തെ ചൊല്ലി വാഗ്വാദം ഉടലെടുത്തു. പാർട്ടിയുടെയും ബഹുജന സംഘടനകളുടെയും നേതൃസ്ഥാനങ്ങളിൽ അടൂർ സ്വദേശികളുടെ ആധിപത്യം ചൂണ്ടിക്കാട്ടി പ്രതിനിധികൾ വിമർശനം ഉന്നയിച്ചു. ഇതിനെതിരെ അടൂർ സ്വദേശികളായ നേതാക്കൾ പ്രതികരിച്ചതോടെ സമ്മേളന വേദി സംഘർഷഭരിതമായി. പ്രസീഡിയത്തിന്റെ ഇടപെടലിനെ തുടർന്നാണ് സാഹചര്യം നിയന്ത്രണ വിധേയമായത്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

“അടൂർ ജില്ലാ സമ്മേളനം” എന്ന് പേരു മാറ്റണമെന്ന പരിഹാസ നിർദേശവും ചർച്ചയ്ക്കിടെ ഉയർന്നു. സിപിഐഎം ജില്ലാ സെക്രട്ടറി, എസ്എഫ്ഐ ജില്ലാ സെക്രട്ടറി, ബാലജനസംഘം നേതൃത്വം, വിവിധ വർഗ-ബഹുജന സംഘടനാ നേതാക്കൾ എന്നിവരെല്ലാം അടൂർ സ്വദേശികളാണെന്ന വസ്തുത ചൂണ്ടിക്കാട്ടിയാണ് വിമർശനം ഉയർന്നത്. ഈ വിഷയത്തിൽ വിവിധ കമ്മിറ്റികൾ പ്രതിഷേധവുമായി രംഗത്തെത്തിയിരുന്നു.

നാളെയാണ് പുതിയ ജില്ലാ സെക്രട്ടറിയുടെയും ജില്ലാ കമ്മിറ്റി അംഗങ്ങളുടെയും തിരഞ്ഞെടുപ്പ് നടക്കുന്നത്. നിലവിലെ സെക്രട്ടറി കെ.പി. ഉദയഭാനു സ്ഥാനമൊഴിയുന്ന സാഹചര്യത്തിൽ, പുതിയ നേതൃത്വം ആരായിരിക്കുമെന്ന ആകാംക്ഷ നിലനിൽക്കുന്നുണ്ട്. മുഖ്യമന്ത്രി പിണറായി വിജയൻ വൈകുന്നേരത്തോടെ സമ്മേളനത്തിലെത്തി, പുതിയ ജില്ലാ സെക്രട്ടറിയെ തിരഞ്ഞെടുക്കുന്നതിനുള്ള ചർച്ചകളിൽ നേരിട്ട് പങ്കെടുക്കുമെന്നാണ് പ്രതീക്ഷിക്കുന്നത്. മൂന്നു ദിവസം നീളുന്ന സമ്മേളനത്തിൽ 263 പ്രതിനിധികളാണ് പങ്കെടുക്കുന്നത്.