കെപിഎം ഹോട്ടലിലെ പാതിരാ പരിശോധനയിൽ പൊലീസ് നടത്തിയ നടപടികൾക്കെതിരെ കോൺഗ്രസ് വനിതാ നേതാക്കൾ സംസ്ഥാന പൊലീസ് മേധാവിക്ക് പരാതി നൽകി. കെപിസിസി രാഷ്ട്രീയകാര്യ സമിതി അംഗം അഡ്വ. ഷാനിമോൾ ഉസ്മാനും ബിന്ദു കൃഷ്ണയുമാണ് ഡിജിപിക്ക് പരാതി സമർപ്പിച്ചത്. പൊലീസ് ചട്ടവിരുദ്ധമായി പ്രവർത്തിച്ചതായും അത് വലിയ മാനസിക പ്രയാസം ഉണ്ടാക്കിയതായും അവർ ആരോപിച്ചു.
നവംബർ അഞ്ചിന് രാത്രി 12 മണിയോടെയാണ് കെപിഎം ഹോട്ടലിൽ അപ്രതീക്ഷിതമായി പൊലീസ് പരിശോധന നടത്തിയത്. ആദ്യം ബിന്ദു കൃഷ്ണയുടെയും ഷാനിമോൾ ഉസ്മാന്റെയും മുറിയിലാണ് പൊലീസ് എത്തിയത്. വനിതാ ഉദ്യോഗസ്ഥരില്ലാത്തതിനാൽ ഷാനിമോൾ ഏറെനേരം വാതിൽ തുറക്കാൻ വിസമ്മതിച്ചു. പിന്നീട് വനിതാ പൊലീസ് എത്തി ഐഡി കാർഡ് കാണിച്ച് മാധ്യമങ്ങളുടെ സാന്നിധ്യത്തിലാണ് മുറി പരിശോധിച്ചത്.
പരിശോധനയ്ക്കായി എത്തിയ സംഘത്തിൽ വനിതാ പൊലീസുകാർ പോലും ഇല്ലാതിരുന്നത് ഗുരുതരമായ വീഴ്ചയാണെന്ന് നേതാക്കൾ ചൂണ്ടിക്കാട്ടി. സംഭവത്തിൽ ബന്ധപ്പെട്ട ഉദ്യോഗസ്ഥർക്കെതിരെ നിയമനടപടി സ്വീകരിക്കണമെന്നും സമഗ്രാന്വേഷം നടത്തണമെന്നും അവർ ആവശ്യപ്പെട്ടു. ഈ സംഭവം വനിതാ നേതാക്കളിൽ ഉണ്ടാക്കിയ മാനസിക സമ്മർദ്ദവും പരാതിയിൽ പ്രതിപാദിച്ചിട്ടുണ്ട്.
Story Highlights: Congress women leaders file complaint with DGP over midnight police raid at KPM Hotel in Palakkad
