ചൂരൽമലയിലെ ഉരുൾപൊട്ടൽ ദുരന്തത്തിൽ രക്ഷാപ്രവർത്തനങ്ගൾ ശക്തമാക്കുന്നതിനായി മന്ത്രിതല യോഗം ചേർന്നു. വയനാട് കലക്ടറേറ്റിൽ ബുധനാഴ്ച രാവിലെ നടന്ന യോഗത്തിൽ പ്രധാന തീരുമാനങ്ങൾ കൈക്കൊണ്ടു. ചൂരൽമലയിലെ കൺട്രോൾ റൂം കേന്ദ്രീകരിച്ച് മെഡിക്കൽ പോയിന്റും ഓക്സിജൻ ആംബുലൻസും ഒരുക്കാൻ തീരുമാനിച്ചു. രക്ഷപ്പെട്ടുവരുന്നവർക്ക് അടിയന്തര വൈദ്യസഹായം ലഭ്യമാക്കുന്നതിനാണ് ഈ സംവിധാനം.
കാര്യങ്ങൾ ഏകോപിപ്പിക്കാൻ മുതിർന്ന ഉദ്യോഗസ്ഥനെ നിയമിക്കുമെന്നും യോഗത്തിൽ തീരുമാനമായി. ആവശ്യത്തിന് ഡോക്ടർമാരെയും മറ്റ് ആരോഗ്യപ്രവർത്തകരെയും നിയോഗിക്കും. കോഴിക്കോട്, തലശ്ശേരി ഉൾപ്പെടെ നാല് സഹകരണ ആശുപത്രികളിൽ നിന്നുള്ള ഡോക്ടർമാരുടെ സംഘം സേവനത്തിന് തയ്യാറാണെന്ന് സഹകരണ മന്ത്രി വി.എൻ. വാസവൻ അറിയിച്ചു. കുടുങ്ങിക്കിടന്നവരെ രക്ഷപ്പെടുത്തി പാലത്തിലൂടെ കൊണ്ടുവരുന്ന സ്ഥലത്ത് വെള്ളം വിതരണം ചെയ്യാനുള്ള സജ്ജീകരണവും ഏർപ്പെടുത്തുമെന്ന് റവന്യൂ മന്ത്രി കെ. രാജൻ വ്യക്തമാക്കി.
ചൂരൽമലയിൽ ജെസിബി നിൽക്കുന്ന സ്ഥലം മുതൽ കൺട്രോൾ റൂം വരെ ആവശ്യത്തിന് ലൈറ്റ് എത്തിക്കുമെന്നും റവന്യൂ മന്ത്രി പറഞ്ഞു. ചൊവ്വാഴ്ച രക്ഷാപ്രവർത്തനത്തിനായി കോഴിക്കോട് നിന്നും മറ്റും എത്തിച്ച അസ്ക വിളക്കുകൾ വളരെയധികം ഉപകാരപ്രദമായതായും മന്ത്രി കൂട്ടിച്ചേർത്തു. യോഗത്തിൽ മന്ത്രിമാരായ പി.എ. മുഹമ്മദ് റിയാസ്, എ.കെ. ശശീന്ദ്രൻ, വി. അബ്ദുറഹ്മാൻ, കെ. കൃഷ്ണൻകുട്ടി, ജി.ആർ. അനിൽ, ഒ.ആർ. കേളു എന്നിവരും രക്ഷാപ്രവർത്തനം ഏകോപിപ്പിക്കുന്ന പ്രത്യേക ഉദ്യോഗസ്ഥൻ സീരാം സാംബശിവറാവു, എഡിഎം കെ. ദേവകി എന്നിവരും പങ്കെടുത്തു.
Story Highlights: Chooralmala landslide: Cabinet meeting decides on medical point and oxygen ambulance at control room
Image Credit: twentyfournews
