Chess Champion Gukesh's Windfall: Huge Tax Benefit for Government

ലോക ചെസ് ചാമ്പ്യൻഷിപ്പിൽ വിജയം നേടിയ ഡി ഗുകേഷിന് കോടികൾ സമ്മാനമായി ലഭിച്ചെങ്കിലും, നികുതി ഇനത്തിൽ വലിയൊരു തുക സർക്കാരിലേക്ക് തിരികെ പോകുന്നു. ഗുകേഷിന്റെ വിജയത്തിലൂടെ സർക്കാരിനാണ് യഥാർത്ഥത്തിൽ ലോട്ടറി അടിച്ചതെന്ന് പറയാം. ചാമ്പ്യൻഷിപ്പിൽ നിന്ന് 11.45 കോടി രൂപയാണ് ഗുകേഷിന് സമ്മാനമായി ലഭിച്ചത്. ഇതിനു പുറമേ, തമിഴ്നാട് സർക്കാർ അഞ്ച് കോടി രൂപയുടെ അധിക സമ്മാനവും പ്രഖ്യാപിച്ചിട്ടുണ്ട്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

എന്നാൽ, ഈ വൻ തുകയിൽ നിന്ന് ഏകദേശം 4.67 കോടി രൂപ ഗുകേഷ് നികുതിയായി ഒടുക്കേണ്ടതുണ്ട്. ഇത് ക്രിക്കറ്റ് ഇതിഹാസം എം.എസ്. ധോണിയുടെ ഐപിഎൽ പ്രതിഫലത്തേക്കാൾ കൂടുതലാണെന്നത് ശ്രദ്ധേയമാണ്. ചെന്നൈ സൂപ്പർ കിങ്സ് ടീം ധോണിയെ നാല് കോടി രൂപയ്ക്കാണ് നിലനിർത്തിയിരുന്നത്.

ലോക ചെസ് ചാമ്പ്യൻഷിപ്പിന്റെ ആകെ സമ്മാനത്തുക 2.5 മില്യൻ യുഎസ് ഡോളർ അഥവാ 21.20 കോടി രൂപയായിരുന്നു. ആകെ 14 ഗെയിമുകൾ ഉൾപ്പെട്ട ടൂർണമെന്റിൽ, ഓരോ ഗെയിം ജയിക്കുമ്പോഴും ജേതാവിന് ഏകദേശം 1.69 കോടി രൂപ ലഭിച്ചു. മൂന്ന് ജയം നേടിയ ഗുകേഷിന് ഇതിലൂടെ 5.07 കോടി രൂപ സമ്മാനമായി ലഭിച്ചു. രണ്ട് ജയം നേടിയ എതിരാളി ഡിങ് ലിറന് 3.38 കോടി രൂപയും ലഭിച്ചു. ബാക്കിയുള്ള സമ്മാനത്തുക ഇരുവർക്കുമായി തുല്യമായി വീതിച്ചതോടെയാണ് ഗുകേഷിന്റെ ആകെ സമ്മാനത്തുക 11.45 കോടി രൂപയായി ഉയർന്നത്.