സ്റ്റേഷനറി ഉൽപ്പന്ന രംഗത്തെ പ്രമുഖ ബ്രാൻഡായ കാംലിൻ്റെ സ്ഥാപകൻ സുഭാഷ് ദന്ദേക്കർ 86-ാം വയസ്സിൽ അന്തരിച്ചു. കുടുംബമാണ് വിയോഗ വാർത്ത പുറത്തുവിട്ടത്. ഇന്നലെ മുംബൈയിൽ സംസ്കാര കർമ്മം നടത്തി. ജപ്പാൻ കമ്പനിയായ കൊകുയോയ്ക്ക് കാംലിൻ ബ്രാൻഡ് ഓഹരികൾ വിറ്റശേഷം, ദന്ദേക്കർ കൊകുയോ കാംലിൻ്റെ ചെയർമാൻ എമിററ്റസ് ആയി തുടരുകയായിരുന്നു.
ചിത്രകലാ ഉൽപ്പന്ന നിർമ്മാണ രംഗത്ത് വിപ്ലവകരമായ മാറ്റം കൊണ്ടുവന്നതാണ് ദന്ദേക്കറുടെ പ്രധാന നേട്ടം. പിന്നീട് ഓഫീസ് ഉൽപ്പന്നങ്ങൾ, പ്രൊഫഷണൽ കലാ ഉൽപ്പന്നങ്ങൾ, വിദ്യാർത്ഥികൾക്കുള്ള ഉപകരണങ്ങൾ എന്നിവയുടെ നിർമ്മാണ-വിതരണ രംഗത്തേക്കും അദ്ദേഹം വ്യാപിച്ചു. ഉൽപ്പന്നങ്ങളുടെ ഉയർന്ന നിലവാരം കമ്പനിക്ക് വിപണിയിൽ സ്ഥിരമായ സ്ഥാനം നേടിക്കൊടുത്തു.
മഹാരാഷ്ട്രയിലെ സ്വകാര്യ മേഖലയുടെ വളർച്ചയിൽ നിർണായക പങ്കുവഹിച്ച വ്യക്തിയായി ബിസിനസ് ലോകം ദന്ദേക്കറെ അനുസ്മരിക്കുന്നു. 1990-1992 കാലഘട്ടത്തിൽ മഹാരാഷ്ട്ര ചേംബർ ഓഫ് കൊമ്മേഴ്സ് ആൻഡ് ഇൻഡസ്ട്രീസിൻ്റെ പ്രസിഡൻ്റായും അദ്ദേഹം സേവനമനുഷ്ഠിച്ചിട്ടുണ്ട്.
