കോഴിക്കോട് കോർപ്പറേഷൻ ഇഎംഎസ് സ്റ്റേഡിയത്തിൽ നടന്ന മത്സരത്തിൽ കലിക്കറ്റ് എഫ്‌സി സ്വന്തം മണ്ണിൽ പ്രഥമ സൂപ്പർ ലീഗ് കിരീടം നേടി. ഫോഴ്‌സ കൊച്ചിയെ 2-1ന് വീഴ്ത്തിയാണ് കാലിക്കറ്റ് ചാമ്പ്യന്മാരായത്. ആവേശക്കടലായി മാറിയ സ്റ്റേഡിയത്തിൽ സീസണിൽ ഉടനീളം സ്ഥിരതയാർന്ന പ്രകടനമാണ് കലിക്കറ്റ് എഫ് സി കാഴ്ചവെച്ചത്.
മത്സരത്തിന്റെ തുടക്കത്തിൽ തന്നെ ആതിഥേയർ ഗോൾ കണ്ടെത്തി. 15-ാം മിനിറ്റിൽ തോയ് സിങ്ങാണ് കലിക്കറ്റിനായി ആദ്യം വലകുലുക്കിയത്. 71-ാം മിനിറ്റിൽ ഹെയ്‌തി മുന്നേറ്റക്കാരൻ കെർവൻസ്‌ ബെൽഫോർട്ടിലൂടെ രണ്ടാം ഗോൾ നേടി. മത്സരത്തിലുടനീളം ആക്രമണ ഫുട്ബോളാണ് കാലിക്കറ്റ് പുറത്തെടുത്തത്. പലകുറി ഇരു ടീമുകളും ഗോൾ മുഖം വിറപ്പിച്ചു.
കളി അവസാനിക്കാനിരിക്കെ 94-ാം മിനിറ്റിൽ കൊച്ചിക്കായി ഡോറിയെൽട്ടൻ ആശ്വാസ ഗോൾ നേടി. സമനില പിടിക്കാനുള്ള കൊച്ചിയുടെ മുന്നേറ്റങ്ങൾ കാലിക്കറ്റ് പ്രതിരോധത്തിൽ തട്ടി വീഴുകയായിരുന്നു. അങ്ങനെ സ്വന്തം തട്ടകത്തിൽ കാലിക്കറ്റ് സൂപ്പർ ലീഗ് കേരളയുടെ കന്നി കിരീടം ഉയർത്തി.
Story Highlights: Calicut FC wins inaugural Super League Kerala title with 2-1 victory over Kochi
