തമിഴ്നാട്ടിലെ ബഹുജൻ സമാജ് പാർട്ടി (ബിഎസ്‌പി) സംസ്ഥാന അധ്യക്ഷൻ കെ ആംസ്ട്രോങ്ങിന്റെ കൊലപാതകത്തിൽ സിബിഐ അന്വേഷണം വേണമെന്ന് പാർട്ടി ദേശീയ അധ്യക്ഷ മായാവതി ആവശ്യപ്പെട്ടു. സംസ്ഥാനത്തെ നിയമവ്യവസ്ഥിതി താറുമാറായെന്നും തമിഴ്നാട് സർക്കാർ ഈ സംഭവം ഗൗരവമായി പരിഗണിക്കുന്നില്ലെന്നും അവർ ആരോപിച്ചു. മായാവതിയും ബിഎസ്‌പി ദേശീയ കോർഡിനേറ്റർ ആകാശ് ആനന്ദും ചെന്നൈയിൽ ആംസ്ട്രോങ്ങിന്റെ വീട്ടിൽ സന്ദർശനം നടത്തി പാർട്ടി പ്രവർത്തകരുമായി സംസാരിച്ചു.
ജൂലൈ അഞ്ചിന് പെരമ്പൂരിലെ വീടിന് സമീപം വെച്ച് ആറംഗ സംഘം ആംസ്ട്രോങ്ങിനെ ആക്രമിച്ചു കൊലപ്പെടുത്തി. ഫുഡ് ഡെലിവറി ചെയ്യുന്നവരെന്ന വ്യാജേന ബൈക്കിലെത്തിയ സംഘമാണ് ആക്രമണം നടത്തിയത്. വെട്ടേറ്റ് ചോരവാർന്ന നിലയിൽ ആശുപത്രിയിലേക്ക് കൊണ്ടുപോകും വഴി അദ്ദേഹം മരണമടഞ്ഞു. സംഭവം നടന്ന് മൂന്നു മണിക്കൂറിനുള്ളിൽ എട്ടുപേരെ കസ്റ്റഡിയിലെടുത്തതായി പോലീസ് അറിയിച്ചു.
കേസന്വേഷണം സിബിഐക്ക് കൈമാറാൻ തയ്യാറാകാത്തത് സർക്കാരിനും കൊലപാതകത്തിൽ പങ്കുണ്ടെന്നതിന്റെ സൂചനയാണെന്ന് മായാവതി കുറ്റപ്പെടുത്തി. ഒരു ദളിത് നേതാവിനെ വെട്ടിക്കൊല്ലാമെങ്കിൽ സാധാരണക്കാരായ ദളിതരുടെ അവസ്ഥ എന്തായിരിക്കുമെന്നും അവർ ചോദിച്ചു. നിയമം കയ്യിലെടുക്കാതെ നിയമത്തിന്റെ വഴിക്കു മാത്രം മുന്നോട്ട് പോകണമെന്നും മായാവതി പ്രവർത്തകരോട് ആവശ്യപ്പെട്ടു. പ്രതികളിലൊരാളായ പൊന്നൈ ബാലുവിന്റെ സഹോദരന്റെ മരണത്തിന്റെ പ്രതികാരമാണ് ഈ കൊലപാതകമെന്നാണ് പ്രാഥമിക വിവരം.
