കോഴിക്കോട് മെഡിക്കൽ കോളേജിൽ യുവാവിന് അപൂർവ്വ ചികിത്സാ വിജയം. ബ്രെയിൻ എവിഎം (ആർട്ടീരിയോ വീനസ് മാൽഫോർമേഷൻ) എന്ന രോഗത്തിന് ട്രാൻസ് വീനസ് റൂട്ട് എമ്പോളൈസേഷൻ എന്ന നൂതന ചികിത്സാരീതിയാണ് വിജയകരമായി പരീക്ഷിച്ചത്. തലച്ചോറിലെ രക്തക്കുഴലുകൾ ജന്മനാ കെട്ടുപിണഞ്ഞു കിടക്കുന്ന അവസ്ഥയാണ് ബ്രെയിൻ എവിഎം. സംസാരശേഷി നഷ്ടപ്പെട്ട് ഒരു വശം തളർന്ന നിലയിലാണ് മലപ്പുറം സ്വദേശിയായ 25 വയസുകാരനെ ആശുപത്രിയിൽ പ്രവേശിപ്പിച്ചത്.
ഇന്റർവെൻഷണൽ റേഡിയോളജി വിഭാഗത്തിൻ കീഴിലാണ് ചികിത്സ നടത്തിയത്. ചികിത്സയ്ക്ക് ശേഷം ആരോഗ്യനിലയിൽ ഗണ്യമായ പുരോഗതിയുണ്ടായതിനെ തുടർന്ന് രോഗിയെ ഡിസ്ചാർജ് ചെയ്തു. ബ്രെയിൻ എവിഎം പോലുള്ള അസുഖങ്ങൾക്ക് പൊതുവെ തലയോട്ടി തുറന്നുള്ള സങ്കീർണ്ണ ശസ്ത്രക്രിയയാണ് നടത്താറുള്ളത്. എന്നാൽ ഈ നൂതന ചികിത്സയിലൂടെ തലയോട്ടി തുറക്കാതെ തന്നെ രോഗം ഭേദമാക്കാൻ സാധിക്കും.
കാലിലെ രക്തക്കുഴൽ വഴി നടത്തുന്ന പിൻ ഹോൾ ചികിത്സയാണ് എമ്പോളൈസേഷൻ. ട്രാൻസ് ആർട്ടീരിയൽ റൂട്ട് വഴിയാണ് സാധാരണയായി എമ്പോളൈസേഷൻ നടത്താറുള്ളത്. എന്നാൽ ഈ രോഗിയിൽ ട്രാൻസ് വീനസ് റൂട്ട് വഴിയാണ് ചികിത്സ നടത്തിയത്. തലച്ചോറിലേക്ക് രക്തമെത്തിക്കുന്ന ധമനികളിലൂടെ കത്തീറ്റർ കടത്തിവിട്ട് അമിത രക്തസ്രാവം തടയുന്നതാണ് ട്രാൻസ് ആർട്ടീരിയൽ റൂട്ട് ചികിത്സ.
ട്രാൻസ് വീനസ് റൂട്ട് ചികിത്സയിൽ തലച്ചോറിൽ നിന്ന് തിരികെ രക്തം ഒഴുകി വരുന്ന സിരകളിലൂടെയാണ് കത്തീറ്റർ കടത്തി വിടുന്നത്. ഈ രണ്ട് ചികിത്സാ രീതികളും സംയോജിപ്പിച്ചാൽ 95 ശതമാനം എവിഎം കേസുകളിലും തലയോട്ടി തുറക്കാതെ തന്നെ രോഗശമനം ഉണ്ടാക്കാൻ സാധിക്കുമെന്ന് വിദഗ്ധർ അഭിപ്രായപ്പെടുന്നു. രാജ്യത്ത് വളരെ കുറച്ച് ആശുപത്രികളിൽ മാത്രമേ ഈ രീതിയിൽ ചികിത്സ വിജയകരമായി നടത്തിയിട്ടുള്ളൂ. നൂതന ചികിത്സാരീതി വിജയകരമായി നടപ്പിലാക്കിയ മെഡിക്കൽ കോളേജിലെ ടീമിനെ ആരോഗ്യമന്ത്രി വീണാ ജോർജ് അഭിനന്ദിച്ചു.
രക്താതിമർദ്ദം, പരുക്ക് എന്നിവ മൂലമല്ലാതെ തലച്ചോറിൽ രക്തസ്രാവമുണ്ടാകുന്ന അസുഖമാണ് ബ്രെയിൻ എവിഎം. യുവാക്കളിൽ തലച്ചോറിൽ രക്തസ്രാവമുണ്ടാകുന്നതിന്റെ പ്രധാന കാരണങ്ങളിലൊന്നാണിത്.
Story Highlights: Calicut Medical College successfully performs rare brain AVM treatment on a young man using transvenous route embolization.
