IFFK Screens 'Body': A Film on Mental Conflicts and Social Reactions

ആളുകൾക്കിടയിൽ നഗ്നനായി നിൽക്കുന്നതായി കാണുന്ന സ്വപ്നത്തിൽ നിന്നാണ് ‘ബോഡി’ എന്ന സിനിമയുടെ ആശയം ഉടലെടുത്തതെന്ന് തിരക്കഥാകൃത്തും സംവിധായകനുമായ അഭിജിത് മജുംദാർ വെളിപ്പെടുത്തി. സ്വന്തം ശരീരത്തിൽ പോലും ആത്മവിശ്വാസമില്ലാത്ത ഒരു സമൂഹത്തിൽ, പൊതുസ്ഥലത്ത് നഗ്നനായി നിൽക്കുന്ന ഒരു പുരുഷനെ കണ്ടാൽ ജനം പ്രകോപിതരാകുന്നതും, അയാൾ തെറ്റ് സമ്മതിക്കാത്ത പക്ഷം കൂട്ടമായി ആക്രമിക്കുന്നതുമായ സാമൂഹിക യാഥാർത്ഥ്യത്തെ ചിത്രം അനാവരണം ചെയ്യുന്നു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഐ.എഫ്.എഫ്.കെയുടെ രണ്ടാം ദിനത്തിൽ രാജ്യാന്തര മത്സര വിഭാഗത്തിൽ പ്രദർശിപ്പിച്ച ഈ ഹിന്ദി ചിത്രം, മാനസിക സംഘർഷങ്ങളിൽ നിന്നും ജീവിത പ്രയാസങ്ങളിൽ നിന്നും മോചനം തേടുന്ന മനോജ് എന്ന നാടക നടന്റെ കഥ പറയുന്നു. മനോജിന്റെ മാനസികാവസ്ഥയും പരിസരവും വ്യക്തമാക്കാൻ ചിത്രത്തിന്റെ ശബ്ദ-ദൃശ്യ മാധ്യമങ്ങൾ കൃത്യമായി ഉപയോഗിച്ചിരിക്കുന്നു. ഛായാഗ്രാഹകൻ വികാസ് ഉർസ്, ശബ്ദ രൂപകൽപ്പന നിർവഹിച്ച അമല പൊപ്പുരി എന്നിവരുടെ മികവ് സിനിമയുടെ ദൃശ്യാനുഭവത്തെ സമ്പന്നമാക്കുന്നു.

നാടക പരിശീലന രംഗങ്ങളിലൂടെ നാടകത്തിന്റെ ദൃശ്യ സാധ്യതകൾ സിനിമയിലേക്ക് മനോഹരമായി സംയോജിപ്പിച്ചിരിക്കുന്നു. ചിത്രത്തിലെ ഭൂരിഭാഗം അണിയറ പ്രവർത്തകരും അഭിനേതാക്കളും പൂനെ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയിലെ മുൻ വിദ്യാർത്ഥികളാണ്. സുഹൃത്തുക്കൾ കേന്ദ്ര കഥാപാത്രമാകുന്ന ചിത്രത്തിൽ, അഭിനേതാക്കളുടെ യഥാർത്ഥ പേരുകൾ തന്നെയാണ് കഥാപാത്രങ്ങൾക്കായി തിരഞ്ഞെടുത്തിരിക്കുന്നത്. അഭിജിത് മജുംദാറിന്റെ ആദ്യ സംവിധാന സംരംഭമായ ‘ബോഡി’യുടെ അടുത്ത പ്രദർശനം ഡിസംബർ 16ന് വൈകീട്ട് 6 മണിക്ക് കലാഭവൻ തിയേറ്ററിൽ നടക്കും.