യുഎൻ പൊതു സഭയിലും ക്വാഡ് ഉച്ചകോടിയിലും പങ്കെടുത്ത് ത്രിദിന യുഎസ് സന്ദർശനം കഴിഞ്ഞെത്തിയ പ്രധാനമന്ത്രിക്ക് ബിജെപിയുടെ സ്വീകരണം.
വാദ്യമേളങ്ങളോടെയാണ് പ്രധാനമന്ത്രിയെ വിമാനത്താവളത്തിൽ നിന്നും സ്വീകരിച്ചത്.
ബിജെപി അധ്യക്ഷൻ ജെ പി നഡ്ഡ, ബിജെപി ജനറൽ സെക്രട്ടറിമാരായ അരുൺ സിംഗ്, തരുൺ ചുഗ്, മുൻ കേന്ദ്രമന്ത്രി ഹർഷ് വർധൻ തുടങ്ങിയവർ വിമാനത്താവളത്തിലെത്തി പ്രധാനമന്ത്രിയെ ഹാരം അണിയിച്ച് സ്വീകരിച്ചു.
മോദിയുടെ ഭരണത്തിൽ ഇന്ത്യയെ ലോകം വ്യത്യസ്തമായി കാണുന്നുവെന്ന് ബിജെപി അധ്യക്ഷൻ ജെ.പി നഡ്ഡ പറഞ്ഞു.
രാജ്യാന്തര തലത്തിൽ ഇന്ത്യയെ നേതൃനിരയിലേക്ക് എത്തിക്കാൻ മോദിക്ക് സാധിച്ചെന്ന് അദ്ദേഹം വ്യക്തമാക്കി.
ഭീകരവാദം, കാലാവസ്ഥാ വ്യതിയാനം തുടങ്ങിയ ചർച്ചകളിലൂടെ ലോക നേതൃത്വത്തിലേക്ക് രാജ്യത്തെ എത്തിക്കാൻ കഴിഞ്ഞെന്നും അദ്ദേഹം പറഞ്ഞു.
അമേരിക്കൻ പ്രസിഡണ്ടായി ജോ ബൈഡൻ അധികാരത്തിൽ എത്തിയതിനുശേഷം ആദ്യമായാണ് ഇരുവരും നേരിട്ട് ചർച്ച നടത്തുന്നത്.
Story Highlights: BJP welcomes PM Modi after US Visit
