മധ്യപ്രദേശിലെ ജബൽപൂർ ജയിലിൽ ഒരു മാസമായി ബിഷപ്പും മലയാളിയായ പ്രിൻസിപ്പലും അടക്കം ഒൻപത് പേർ റിമാൻഡിൽ കഴിയുന്നു. സി.എൻ.ഐ മാനേജ്മെന്റ് സ്കൂളുമായി ബന്ധപ്പെട്ട് ഉയർന്ന ആക്ഷേപങ്ങളുടെ അടിസ്ഥാനത്തിലാണ് ഇവരുടെ അറസ്റ്റ്. പ്രിൻസിപ്പൽ ഷാജി തോമസും സി എൻ ഐ ബിഷപ്പും ഉൾപ്പെടെയുള്ളവരാണ് ജാമ്യമില്ലാതെ ജയിലിൽ തുടരുന്നത്.
സ്കൂളിൽ വാർഷിക ഫീസ് ഉയർത്തി എന്നതും പുസ്തക വിപണനക്കാരിൽ നിന്നും കമ്മീഷൻ സ്കൂൾ വാങ്ങി എന്നതുമാണ് അറസ്റ്റിലായവർ നേരിടുന്ന പ്രധാന ആരോപണങ്ങൾ. എന്നാൽ, സ്വകാര്യ സ്കൂളുകൾക്ക് ഓരോ വർഷവും പത്ത് ശതമാനം ഫീസ് ഉയർത്താൻ അധികാരമുണ്ടെങ്കിലും, ഇത് അനുവദനീയമല്ല എന്ന നിലപാടാണ് മധ്യപ്രദേശ് പൊലീസ് സ്വീകരിച്ചിരിക്കുന്നത്. ന്യൂനപക്ഷ സമുദായ വിദ്യാഭ്യാസ സ്ഥാപനങ്ങൾക്കുള്ള അവകാശങ്ങളും പൊലീസ് പരിഗണിച്ചിട്ടില്ല.
രേഖകൾ അടക്കം ലഭ്യമാക്കാൻ പൊലീസ് തയ്യാറാകാത്തതിനാൽ അറസ്റ്റിലായവർക്ക് ജാമ്യാപേക്ഷ സമർപ്പിക്കാൻ സാധിക്കുന്നില്ല. മധ്യപ്രദേശ് പൊലീസിന്റെ നടപടിയിൽ വിവിധ ന്യൂനപക്ഷ സംഘടനകൾ സർക്കാരിന് പരാതി നൽകിയെങ്കിലും ഇതുവരെ ഫലം ഉണ്ടായിട്ടില്ല. ഈ സാഹചര്യത്തിൽ, അറസ്റ്റിലായവരുടെ നിയമപരമായ അവകാശങ്ങളും ന്യൂനപക്ഷ വിദ്യാഭ്യാസ സ്ഥാപനങ്ങളുടെ പ്രശ്നങ്ങളും വലിയ ചർച്ചയായി മാറിയിരിക്കുകയാണ്.
