പ്രേക്ഷകരുടെ ആകാംക്ഷ വർധിപ്പിച്ചുകൊണ്ട് അമൽ നീരദ് ചിത്രം ‘ബോഗയ്‌ന്‍വില്ല’യുടെ പുതിയ അപ്‌ഡേറ്റുകൾ പുറത്തുവരുന്നു. ഇപ്പോൾ സിനിമയിലെ പ്രധാന കഥാപാത്രങ്ങളുടെ ക്യാരക്ടർ പോസ്റ്ററുകളാണ് അണിയറപ്രവർത്തകർ പുറത്തുവിട്ടിരിക്കുന്നത്. കുഞ്ചാക്കോ ബോബൻ, ഫഹദ് ഫാസിൽ, ജ്യോതിർമയി, ഷറഫുദ്ദീൻ, ശ്രിന്ദ എന്നിവരുടെ കഥാപാത്രങ്ങളുടെ പോസ്റ്ററുകളാണ് പുറത്തുവന്നിരിക്കുന്നത്. സിനിമയുടെ ട്രെയിലർ നാളെ ആറുമണിക്ക് പുറത്തിറങ്ങുമെന്നും അറിയിച്ചിട്ടുണ്ട്.
‘സ്തുതി’, ‘മറവികളെ പറയൂ…’ എന്നീ ഹിറ്റ് ഗാനങ്ങൾക്ക് ശേഷം പുറത്തുവന്ന ഈ ക്യാരക്ടർ പോസ്റ്ററുകൾ സിനിമയ്ക്കായുള്ള പ്രതീക്ഷ വർധിപ്പിക്കുന്നു. കുഞ്ചാക്കോ ബോബൻ, ഫഹദ് ഫാസിൽ, ജ്യോതിർമയി എന്നിവരെ കേന്ദ്രകഥാപാത്രങ്ങളാക്കി ഒരുക്കുന്ന ഈ ചിത്രം ഒക്ടോബർ 17ന് തിയേറ്ററുകളിലെത്തും. സുഷിൻ ശ്യാമിന്റെ സംഗീതം ഏറെ വ്യത്യസ്തമാണെന്ന് പുറത്തുവന്ന രണ്ട് ഗാനങ്ങളും സൂചിപ്പിക്കുന്നു.
കുഞ്ചാക്കോ ബോബനും അമൽ നീരദും ആദ്യമായി ഒന്നിക്കുന്ന ചിത്രമാണിത്. ഏറെ നാളുകൾക്ക് ശേഷം ജ്യോതിർമയി അഭിനയിക്കുന്ന സിനിമ കൂടിയാണ് ‘ബോഗയ്‌ന്‍വില്ല’. ഷറഫുദ്ദീൻ, വീണ നന്ദകുമാർ തുടങ്ങിയവരും പ്രധാന വേഷങ്ങളിൽ എത്തുന്നു. ലാജോ ജോസിനൊപ്പം ചേർന്നാണ് അമൽ നീരദ് തിരക്കഥ ഒരുക്കിയിരിക്കുന്നത്. ആനന്ദ് സി ചന്ദ്രനാണ് ഛായാഗ്രാഹകൻ. അമൽ നീരദ് പ്രൊഡക്ഷൻസിന്റേയും ഉദയ പിക്ചേഴ്സിന്റേയും ബാനറിൽ ജ്യോതിർമയിയും കുഞ്ചാക്കോ ബോബനും ചേർന്നാണ് സിനിമ നിർമ്മിക്കുന്നത്.
Story Highlights: Amal Neerad’s ‘Bougainvillea’ releases character posters, trailer to be out tomorrow, starring Kunchacko Boban, Fahadh Faasil, and Jyothirmayee.
