Excise Notice to Actors in Alappuzha Cannabis Case

**ആലപ്പുഴ◾:** ഹൈബ്രിഡ് കഞ്ചാവ് കേസിൽ നടന്മാരായ ഷൈൻ ടോം ചാക്കോ, ശ്രീനാഥ് ഭാസി എന്നിവർക്ക് എക്സൈസ് നോട്ടീസ് അയച്ചു. ഒരാഴ്ചക്കുള്ളിൽ അന്വേഷണ ഉദ്യോഗസ്ഥർക്ക് മുമ്പാകെ ഹാജരാകാനാണ് നിർദ്ദേശം. മുഖ്യപ്രതി തസ്ലീമ സുൽത്താന നൽകിയ മൊഴിയുടെ അടിസ്ഥാനത്തിലാണ് നടപടി. തസ്ലീമയിൽ നിന്ന് ലഹരിമരുന്ന് വാങ്ങിയെന്നാണ് മൊഴി. പ്രതികളെ എറണാകുളത്ത് എത്തിച്ച് ഇന്ന് തെളിവെടുപ്പ് നടത്തും.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

തസ്ലീമയുടെ ഫോണിലെ ഡാറ്റയും വാട്സ്ആപ്പ് ചാറ്റുകളും ശാസ്ത്രീയ പരിശോധനയിലൂടെ വീണ്ടെടുക്കുന്ന പ്രക്രിയ പുരോഗമിക്കുകയാണ്. മോഡലുകൾ അടക്കമുള്ള ഒട്ടേറെ സ്ത്രീകളുടെ ചിത്രങ്ങൾ ഫോണിൽ നിന്നും കണ്ടെടുത്തു. ഷൈൻ ടോം ചാക്കോയുടെ ചാറ്റ് പൂർണ്ണമായും ഡിലീറ്റ് ചെയ്ത നിലയിലാണ്. മൂന്ന് കിലോ ഹൈബ്രിഡ് കഞ്ചാവ് കൂടാതെ മൂന്ന് കിലോ കൂടി തസ്ലീമ എറണാകുളത്ത് എത്തിച്ചു എന്നാണ് എക്സൈസിന്റെ കണ്ടെത്തൽ.

നടൻ ശ്രീനാഥ് ഭാസിയോട് ഹൈബ്രിഡ് കഞ്ചാവ് വേണമോ എന്ന് ചാറ്റിൽ തസ്ലീമ ചോദിക്കുന്നുണ്ട്. ‘WAIT’ എന്നായിരുന്നു ശ്രീനാഥ് ഭാസിയുടെ മറുപടി. അറസ്റ്റിലാകുന്നതിന് രണ്ട് ദിവസം മുമ്പാണ് തസ്ലീമ ശ്രീനാഥ് ഭാസിയുമായി ചാറ്റ് ചെയ്തത്. ഇത് ആർക്കൊക്കെ കൈമാറി എന്നറിയാൻ പ്രതികളെ വിശദമായി ചോദ്യം ചെയ്തു വരികയാണ്.

തസ്ലീമയുമായി ബന്ധമുണ്ടെന്ന് ഷൈൻ ടോം ചാക്കോ കഴിഞ്ഞദിവസം കൊച്ചിയിൽ പൊലീസിനോട് സമ്മതിച്ചിരുന്നു. തസ്ലീമ ഫോണിൽ മെസ്സേജ് അയച്ചിരുന്നു എന്ന് നടൻ ശ്രീനാഥ് ഭാസിയും ഹൈക്കോടതിയിൽ സമർപ്പിച്ച മുൻകൂർ ജാമ്യ ഹർജിയിൽ സൂചിപ്പിച്ചിരുന്നു. ലഹരി വിൽപ്പനയ്ക്ക് അപ്പുറമുള്ള അടുത്ത ബന്ധം ഇരുവരുമായും ഉണ്ടെന്നാണ് തസ്ലീമയുടെ മൊഴി.

ഷൈൻ ടോം വിവാദം: വിൻസിയെ പിന്തുണച്ച് സുഭാഷ് പോണോളി

സ്വർണ്ണക്കടത്ത് കേസിൽ നേരത്തെ അറസ്റ്റിലായ വിവരങ്ങൾ തസ്ലീമ അന്വേഷണ സംഘത്തോട് പങ്കുവെച്ചു. 2017 ൽ ഡൽഹിയിൽ നിന്ന് സ്വർണം കടത്തുന്നതിനിടയിലാണ് പിടിയിലായത്. അഞ്ച് ദിവസത്തോളം തിഹാർ ജയിലിൽ കഴിഞ്ഞു. ഷൈൻ ടോം ചാക്കോയ്ക്കും ശ്രീനാഥ് ഭാസിക്കും എക്സൈസ് നോട്ടീസ് നൽകി.

Story Highlights: Excise notice issued to Shine Tom Chacko and Sreenath Bhasi in Alappuzha hybrid cannabis case.

നടിമാർക്കെതിരെ പരാമർശം: ആറാട്ടണ്ണനെതിരെ ഉഷ ഹസീന പരാതി നൽകി