M.K. Sanu attends LuLu Mall's 12th anniversary

**കൊച്ചി◾:** പ്രശസ്ത സാഹിത്യകാരനായ പ്രൊഫ. എം.കെ. സാനു തന്റെ 98-ാം വയസ്സിൽ കൊച്ചി ലുലു മാളിലെ 12-ാം വാർഷികാഘോഷത്തിൽ പങ്കെടുത്തു. ലുലു മാളിന്റെ കാഴ്ചകൾ കണ്ട് അത്ഭുതസ്തബ്ധനായെന്ന് അദ്ദേഹം പറഞ്ഞു. ലുലു മാൾ അധികൃതർ സാനു മാഷിനെ സ്നേഹപൂർവ്വം വരവേറ്റു. മാളിലൂടെ ഒരു മണിക്കൂറിലധികം സമയം മാഷ് നടന്നു. ലുലു റീജണൽ ഡയറക്ടർ സാദിഖ് ഖാസിമും ലുലു ഇന്ത്യ മീഡിയ ഹെഡ് എൻ.ബി. സ്വരാജും ചേർന്ന് അദ്ദേഹത്തെ മാളിലെ കാഴ്ചകൾ വിവരിച്ചു നൽകി. ലുലു ഗ്രൂപ്പ് ചെയർമാൻ എം.എ. യൂസഫലിയെക്കുറിച്ചുള്ള ഓർമ്മകളും സാനു മാഷ് പങ്കുവച്ചു. ലോക പ്രശസ്തമായ ലുലു മാൾ വിദഗ്ധമായി നടത്തിക്കൊണ്ടുപോകുന്നതിൽ എം.എ. യൂസഫലിയുടെ പങ്ക് വലുതാണെന്ന് അദ്ദേഹം അഭിപ്രായപ്പെട്ടു. ഒരു രാജ്യത്തിന്റെ രക്തനാഡി എന്നത് വാണിജ്യമാണെന്നും ആ വാണിജ്യ ലോകത്ത് അതുല്യനായ വ്യക്തിയായി എം.എ. യൂസഫലി മാറിയെന്നും സാനു മാഷ് പറഞ്ഞു.

ലുലുവിന്റെ പ്രവർത്തന രീതിയുടെ മികവാണ് അതിന്റെ വിജയത്തിന് പിന്നിലെന്നും സാനു മാഷ് കൂട്ടിച്ചേർത്തു. ജീവനക്കാർക്ക് മാത്രമല്ല, സാധനങ്ങൾ വാങ്ങാൻ എത്തുന്നവർ പോലും മാളിന്റെ ഗുണഭോക്താക്കളായി മാറി കഴിഞ്ഞുവെന്നും അദ്ദേഹം പറഞ്ഞു. കഴിഞ്ഞ 12 വർഷത്തിനകം 22 കോടി ജനങ്ങൾ ലുലു മാൾ സന്ദർശിച്ചു എന്നത് അവിശ്വസനീയമായ കാര്യമാണെന്ന് അദ്ദേഹം അഭിപ്രായപ്പെട്ടു.

വിവാഹം കഴിഞ്ഞ് രണ്ടാഴ്ച; യുവതി കാമുകനൊപ്പം ചേർന്ന് ഭർത്താവിനെ കൊലപ്പെടുത്തി

വാർഷികാഘോഷത്തിൽ സാനു മാഷിനെ ലുലു ഗ്രൂപ്പ് ഇന്ത്യ സി.ഇ.ഒയും ഡയറക്ടറുമായ എം.എ. നിഷാദ് പൊന്നാട അണിയിച്ചും ഉപഹാരം നൽകിയും ആദരിച്ചു. 12-ാമത് വാർഷികാഘോഷത്തിന്റെ കേക്ക് മുറിക്കൽ ചടങ്ങ് സാനു മാഷ് നിർവഹിച്ചു. നിരവധി പേർ സാനു മാഷിനെ കണ്ട് പരിചയം പുതുക്കുകയും സെൽഫിയെടുക്കുകയും ചെയ്തു.

ലുലു ഇന്ത്യ സി.ഇ.ഒയും ഡയറക്ടറുമായ എം.എ. നിഷാദ്, ലുലു മാൾസ് ഇന്ത്യ ഡയറക്ടർ ഷിബു ഫിലിപ്പ്, ലുലു റീജണൽ ഡയറക്ടർ സാദിഖ് ഖാസിം, ലുലു ഇന്ത്യ മീഡിയ ഹെഡ് എൻ.ബി. സ്വരാജ്, ലുലു ഇന്ത്യ ഹൈപ്പർമാർക്കറ്റ് ജനറൽ മാനേജർ സുധീഷ് നായർ, കൊച്ചി ലുലു മാൾ ജനറൽ മാനേജർ വിഷ്ണു ആർ നാഥ്, ലുലു ഹൈപ്പർ മാർക്കറ്റ് ജനറൽ മാനേജർ ജോ പൈനേടത്ത്, ലുലു മാൾ ഡെപ്യൂട്ടി ജനറൽ മാനേജർ ജയേഷ് നായർ, ഓപ്പറേഷൻസ് മാനേജർ ഒ. സുകുമാരൻ തുടങ്ങിയവർ ചടങ്ങിൽ സംബന്ധിച്ചു. ഇലക്ട്രിക് വീൽചെയറിൽ സഞ്ചരിക്കാനുള്ള അഭ്യർത്ഥന നിരസിച്ചു കൊണ്ട് സാനു മാഷ് മാളിലൂടെ നടന്നു.