എമ്പുരാൻ റിലീസ് തീയതി പ്രഖ്യാപിച്ചു; മാർച്ച് 27 ന് പുലർച്ചെ 6 മണിക്ക് ആദ്യ ഷോ

ലോകമെമ്പാടുമുള്ള സിനിമാപ്രേമികൾ ആവേശത്തോടെ കാത്തിരിക്കുന്ന മോഹൻലാൽ ചിത്രം എമ്പുരാന്റെ റിലീസ് തീയതി പ്രഖ്യാപിച്ചു. മാർച്ച് 27ന് പുലർച്ചെ 6 മണിക്ക് ചിത്രത്തിന്റെ ആദ്യ ഷോ ആരംഭിക്കും. ലൂസിഫറിന്റെ രണ്ടാം ഭാഗമായ എമ്പുരാൻ, മൂന്ന് ഭാഗങ്ങളുള്ള ഒരു സിനിമാ പരമ്പരയുടെ ഭാഗമാണ്. മോഹൻലാൽ, പൃഥ്വിരാജ്, മുരളി ഗോപി, ആന്റണി പെരുമ്പാവൂർ എന്നിവർ മൂന്നാം ഭാഗത്തിലും ഒന്നിക്കുമെന്ന് സ്ഥിരീകരിച്ചിട്ടുണ്ട്.

പൃഥ്വിരാജ് സുകുമാരൻ സംവിധാനം ചെയ്ത ചിത്രം മുരളി ഗോപിയാണ് രചിച്ചിരിക്കുന്നത്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ പാൻ ഇന്ത്യൻ റിലീസായിട്ടാണ് ചിത്രം എത്തുന്നത്. ലൈക്ക പ്രൊഡക്ഷൻസ്, ആശീർവാദ് സിനിമാസ്, ശ്രീ ഗോകുലം മൂവീസ് എന്നിവയുടെ ബാനറിൽ സുഭാസ്കരൻ, ആന്റണി പെരുമ്പാവൂർ, ഗോകുലം ഗോപാലൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. ഖുറേഷി- അബ്രാം/ സ്റ്റീഫൻ നെടുമ്പള്ളി എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്.

പൃഥ്വിരാജ്, മഞ്ജു വാര്യർ, ടൊവിനോ തോമസ്, ഇന്ദ്രജിത്ത് സുകുമാരൻ തുടങ്ങി വമ്പൻ താരനിരയാണ് ചിത്രത്തിൽ അണിനിരക്കുന്നത്. ഗെയിം ഓഫ് ത്രോൺസ് താരം ജെറോം ഫ്ലിന്നിന്റെ സാന്നിധ്യം ചിത്രത്തിന് അന്താരാഷ്ട്ര തലത്തിൽ ശ്രദ്ധ നേടിക്കൊടുത്തിട്ടുണ്ട്. 2023 ഒക്ടോബർ 5ന് ഫരീദാബാദിൽ ചിത്രീകരണം ആരംഭിച്ച എമ്പുരാൻ, വിവിധ ലൊക്കേഷനുകളിലായാണ് ചിത്രീകരിച്ചത്. ദീപക് ദേവ് ആണ് സംഗീത സംവിധാനം നിർവഹിച്ചിരിക്കുന്നത്.

സുജിത്ത് വാസുദേവ് ഛായാഗ്രഹണവും അഖിലേഷ് മോഹൻ എഡിറ്റിംഗും നിർവഹിച്ചിരിക്കുന്നു.

കഴിഞ്ഞ ജനുവരി 26ന് ആദ്യ ടീസർ പുറത്തിറങ്ങിയതോടെ ചിത്രത്തിന്റെ പ്രമോഷൻ പ്രവർത്തനങ്ങൾ ആരംഭിച്ചു. ഫെബ്രുവരി ഒന്നു മുതൽ ചിത്രത്തിലെ കഥാപാത്രങ്ങളെ പരിചയപ്പെടുത്തുന്ന വീഡിയോകൾ പുറത്തിറങ്ങി. ഫെബ്രുവരി 26ന് മോഹൻലാലിന്റെ കഥാപാത്ര പോസ്റ്ററും വീഡിയോയും പുറത്തിറങ്ങിയതോടെയാണ് ഈ പരമ്പര അവസാനിച്ചത്.

മാർച്ച് 27ന് മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ റിലീസ് ചെയ്യുന്ന എമ്പുരാൻ ഒരു മലയാള ചിത്രത്തിന് ലഭിക്കുന്ന ഏറ്റവും വലിയ പാൻ ഇന്ത്യൻ, ആഗോള റിലീസുകളിൽ ഒന്നായിരിക്കും. പൂർണ്ണമായും അനാമോർഫിക് ഫോർമാറ്റിൽ ചിത്രീകരിച്ച ചിത്രത്തിന്റെ മൂന്നാം ഭാഗവും ഇതേ ഫോർമാറ്റിൽ തന്നെയായിരിക്കുമെന്ന് പൃഥ്വിരാജ് വ്യക്തമാക്കിയിട്ടുണ്ട്.

Story Highlights: Mohanlal’s much-anticipated film Empuraan, the sequel to Lucifer, will have its first show on March 27 at 6 am, with a pan-Indian release in five languages.