Sudhir Sukamaran's plumbing work video goes viral

സിനിമയിലെ വില്ലൻ വേഷങ്ങളിൽ തിളങ്ങി നിൽക്കുന്ന സുധീർ സുകുമാരൻ, ജീവിതത്തിൽ യഥാർത്ഥ നായകനാണെന്ന് ആരാധകർ അഭിപ്രായപ്പെടുന്നു. പ്ലംബിംഗ് ജോലികൾ ചെയ്യുന്ന താരത്തിന്റെ വീഡിയോ സമൂഹമാധ്യമങ്ങളിൽ വൈറലാണ്. “സിനിമയിൽ വരും മുമ്പ് എല്ലാ തൊഴിലും ചെയ്തിട്ടുണ്ട്. ഇപ്പോൾ ഓരോന്നായി ചെയ്തു നോക്കുന്നു. ഇതിൽ നിന്ന് കിട്ടുന്ന സന്തോഷം ഒന്നു വേറെ തന്നെയാണ്” എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്. കൊച്ചിരാജാവ്, സി ഐ ഡി മൂസ തുടങ്ങിയ ചിത്രങ്ങളിലൂടെ പ്രേക്ഷകരുടെ മനസ്സിൽ ഇടം നേടിയ താരം മലയാളത്തിനു പുറമെ മറ്റ് ഭാഷകളിലും അഭിനയിച്ചിട്ടുണ്ട്. 2012-ൽ പുറത്തിറങ്ങിയ വിനയൻ ചിത്രം ‘ഡ്രാക്കുള’ സുധീറിന്റെ കരിയറിലെ വഴിത്തിരിവായിരുന്നു. സിനിമയിലെ വില്ലൻ വേഷങ്ങളിൽ നിന്ന് വ്യത്യസ്തമായി ജീവിതത്തിൽ ഒരു റിയൽ ഹീറോ ആണ് സുധീറെന്ന് ആരാധകർ പറയുന്നു. സി ഐ ഡി മൂസയിലെ വെടിയുണ്ട തുളച്ചു കയറിയ രംഗം ഓർത്തെടുത്ത ആരാധകർ ആ വേദന തങ്ങളുടെ നെഞ്ചത്താണ് തറച്ചതെന്ന് കമന്റ് ചെയ്തു. പഴയ വില്ലൻ വേഷങ്ങൾ ഇനിയും കാണാൻ കഴിയുമോ എന്നും ആരാധകർ ചോദിക്കുന്നു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

View this post on Instagram

A post shared by Sudhir Sukumaran (@sudhir_actor)

സാധാരണക്കാരനായ വലിയവൻ എന്നാണ് ആരാധകർ സുധീറിനെ വിശേഷിപ്പിക്കുന്നത്. കാൻസറിനെ അതിജീവിച്ച് ജീവിതത്തിലേക്കും സിനിമയിലേക്കും തിരിച്ചുവന്ന സുധീറിന് ഒരു പീഡന ആരോപണവും നേരിടേണ്ടി വന്നിരുന്നു. വൈറലായ വീഡിയോയിൽ പ്ലംബിംഗ് ജോലികൾ ചെയ്യുന്ന നടനെയാണ് കാണാൻ സാധിക്കുന്നത്. ഓരോ ജോലികളും ചെയ്തു നോക്കുന്നതിലൂടെ ലഭിക്കുന്ന സന്തോഷം വേറിട്ടതാണെന്ന് സുധീർ പറയുന്നു.