വനിതാ ട്വന്റി20 ലോകകപ്പിൽ ഇന്ത്യക്ക് വിജയത്തുടക്കം; ജോഷിത താരം

വയനാട്ടുകാരിയായ വി ജെ ജോഷിതയുടെ മികച്ച പ്രകടനത്തിലൂടെ അണ്ടർ 19 വനിതാ ട്വന്റി20 ക്രിക്കറ്റ് ലോകകപ്പിൽ ഇന്ത്യ വിജയത്തോടെ തുടക്കം കുറിച്ചു. വെസ്റ്റ് ഇൻഡീസിനെതിരായ മത്സരത്തിൽ ഇന്ത്യയുടെ വിജയത്തിൽ നിർണായക പങ്കുവഹിച്ച ജോഷിതയ്ക്ക് പ്ലെയർ ഓഫ് ദ മാച്ച് പുരസ്കാരം ലഭിച്ചു. നിലവിലെ ചാമ്പ്യന്മാരായ ഇന്ത്യയ്ക്ക് ആധികാരിക ജയം നേടാൻ മലയാളി പേസ് ബൗളറായ ജോഷിതയുടെ പ്രകടനം സഹായകമായി. ജോഷിതയുടെ ബൗളിംഗ് മികവിൽ വെസ്റ്റ് ഇൻഡീസ് വനിതാ ടീം 13.2 ഓവറിൽ 44 റൺസിന് പുറത്തായി. 4.2 ഓവറിൽ ഒരു വിക്കറ്റ് മാത്രം നഷ്ടപ്പെടുത്തി ഇന്ത്യ വിജയലക്ഷ്യം കൈവരിച്ചു. തുടർച്ചയായി രണ്ട് വിക്കറ്റുകൾ വീഴ്ത്തിയ ജോഷിതയാണ് മത്സരത്തിലെ താരം.

കൃഷ്ണഗിരി വയനാട് ക്രിക്കറ്റ് അക്കാദമിയിലൂടെയാണ് ജോഷിതയുടെ ക്രിക്കറ്റ് ജീവിതത്തിന്റെ തുടക്കം. ആറാം ക്ലാസ് പഠനകാലത്താണ് കേരള ക്രിക്കറ്റ് അക്കാദമിക്ക് കീഴിലുള്ള ഈ അക്കാദമിയിൽ ജോഷിത ചേരുന്നത്. കേരളത്തിന്റെ അണ്ടർ 16, 19, 23 ടീമുകളിൽ മികച്ച പ്രകടനം കാഴ്ചവച്ച ജോഷിത അണ്ടർ-19 ത്രിരാഷ്ട്ര കപ്പിനുള്ള ഇന്ത്യൻ എ ടീമിലും പിന്നീട് ഏഷ്യാകപ്പിനുള്ള ദേശീയ ടീമിലും ഇടം നേടി. മകളുടെ നേട്ടത്തിൽ അതിയായ സന്തോഷമുണ്ടെന്ന് അമ്മ ശ്രീജ പ്രതികരിച്ചു. ഏഷ്യാകപ്പ് ഫൈനലിൽ ബംഗ്ലാദേശിനെതിരെ ഇന്ത്യയുടെ ആദ്യ വിക്കറ്റ് നേടിയതും ജോഷിതയായിരുന്നു. ഈ സീസണിൽ വനിതാ ക്രിക്കറ്റ് ലീഗിൽ റോയൽ ചലഞ്ചേഴ്‌സ് ബാംഗ്ലൂരിനായും ജോഷിത കളിക്കും. ബത്തേരി സെന്റ് മേരീസ് കോളേജിൽ രണ്ടാം വർഷ ബിരുദ വിദ്യാർത്ഥിനിയാണ് ജോഷിത. കൽപ്പറ്റ അമ്പിലേരിയിലെ ജോഷിയുടെയും ശ്രീജയുടെയും മകളാണ്. നാളെ മലേഷ്യയ്‌ക്കെതിരെയാണ് അണ്ടർ 19 വനിതാ ട്വന്റി20 ക്രിക്കറ്റ് ലോകകപ്പിൽ ഇന്ത്യയുടെ അടുത്ത മത്സരം. Story Highlights: Wayanad native VJ Joshitha led India to victory in the U19 Women’s T20 World Cup opener against West Indies.