ഭൂമിയെ ചുറ്റുന്ന ചന്ദ്രന് കൂട്ടായി എത്തിയ ഛിന്നഗ്രഹം ഇനി വിദൂര പ്രപഞ്ചത്തിലേക്ക് യാത്ര തുടങ്ങുകയാണ്. രണ്ടാം ചന്ദ്രനെന്ന് വാഴ്ത്തപ്പെട്ട 2024 പിടി 5 എന്ന ഈ ഛിന്നഗ്രഹം രണ്ട് മാസത്തോളം ഭൂമിയോടു വിശേഷം പറഞ്ഞശേഷമാണ് അകലുന്നത്. ഭൂമിയിൽ നിന്ന് 3.5 ദശലക്ഷം കിലോമീറ്റർ മാത്രം അകലെയാണ് ഈ മിനി ചന്ദ്രൻ ഉണ്ടായിരുന്നത്. നാസയുടെ സഹായത്തോടെയുള്ള ഛിന്നഗ്രഹ നിരീക്ഷണ സംവിധാനമായ ആസ്റ്ററോയ്ഡ് ടെറസ്ട്രിയൽ-ഇംപാക്റ്റ് ലാസ്റ്റ് അലർട്ട് സിസ്റ്റത്തിലെ ഗവേഷകരാണ് ഇതിനെ കണ്ടെത്തിയത്.
ചെറിയ വലുപ്പവും മങ്ങിയ തെളിച്ചവും കാരണം നഗ്നനേത്രങ്ങൾക്ക് ഈ ഛിന്നഗ്രഹം ദൃശ്യമായിരുന്നില്ല. എന്നാൽ ജനുവരിയിൽ മിനി മൂൺ വീണ്ടും സന്ദർശിക്കുമെന്ന് ശാസ്ത്രജ്ഞർ പ്രതീക്ഷ പ്രകടിപ്പിച്ചു. ഛിന്നഗ്രഹത്തിന്റെ ഉത്ഭവത്തെക്കുറിച്ച് വിവിധ സിദ്ധാന്തങ്ങൾ നിലവിലുണ്ട്. നാസ ഉദ്യോഗസ്ഥർ അനുമാനിക്കുന്നത് ഇത് ഭൂമിയുടെ ചന്ദ്രന്റെ തന്നെ ഒരു പുരാതന ആഘാതത്തിന്റെ ഫലമായുള്ള ശകലമാകാമെന്നാണ്.
ഓരോ വർഷവും ചെറുതും വലുതുമായ ഒട്ടേറെ ഛിന്നഗ്രഹങ്ങൾ ഭൂമിയുടെ ഭ്രമണപഥത്തിനു സമീപത്തുകൂടി കടന്നു പോകാറുണ്ട്. എന്നാൽ 2024 പിടി 5 ഭൂമിയുടെ ഗുരുത്വാകർഷണ ബലത്താൽ ആകർഷിക്കപ്പെടുമെന്നതാണ് പ്രത്യേകത. ഭൂമിയുടെ ഗുരുത്വാകർഷണത്തിൽ നിന്ന് രക്ഷപ്പെടാൻ കഴിയാത്ത ഇത്തരം ഛിന്നഗ്രഹങ്ങളെയാണ് ‘മിനി മൂൺ’ എന്ന് വിളിക്കുന്നത്. ഇത്തരം പ്രതിഭാസങ്ങൾ ബഹിരാകാശ പഠനത്തിന് പുതിയ വഴികൾ തുറക്കുന്നു.
Story Highlights: Earth bids farewell to its mini-moon, 2024 PT5, after months-long companionship
