ജിയോ പുതിയ തന്ത്രവുമായി രംഗത്തെത്തിയിരിക്കുന്നു. കുത്തനെ നിരക്ക് കൂട്ടിയതിനെ തുടർന്ന് ബിഎസ്എൻഎല്ലിലേക്ക് കൂടുവിട്ട് പറന്ന ലക്ഷക്കണക്കിന് ഉപഭോക്താക്കളെ തിരിച്ചെത്തിക്കാനാണ് ഈ നീക്കം. ഒരു വർഷത്തേക്ക് ചുരുങ്ങിയ നിരക്കിൽ അൺലിമിറ്റഡ് ഡാറ്റ നൽകുന്ന പദ്ധതിയാണ് കമ്പനി അവതരിപ്പിച്ചിരിക്കുന്നത്. 601 രൂപയ്ക്ക് റീചാർജ് ചെയ്താൽ ഒരു വർഷത്തേക്ക് അൺലിമിറ്റഡ് 5ജി ഡാറ്റ ലഭിക്കും. ഇത് പ്രതിമാസം 51 രൂപ എന്ന നിരക്കിലാണ്.
പ്രീപെയ്ഡ് ഉപയോക്താക്കൾക്ക് മൈജിയോ ആപ്പിലൂടെയോ മറ്റ് പ്ലാറ്റ്‌ഫോമുകളിലൂടെയോ ഈ പാക്കേജ് തെരഞ്ഞെടുക്കാം. 30 ദിവസത്തെ വാലിഡിറ്റിയുള്ള 51 രൂപ വീതമുള്ള വൗച്ചറുകളായിട്ടാണ് പ്ലാൻ ലഭിക്കുന്നത്. ആവശ്യാനുസരണം ഇത് ആക്ടീവേറ്റ് ചെയ്യാൻ സാധിക്കും. ജിയോ 5ജി ഉപയോഗിക്കുന്നവർക്കായി 1,111 രൂപയ്ക്ക് എയർഫൈബർ കണക്ഷൻ നൽകുന്ന പദ്ധതിയും ഇതിനൊപ്പം പുറത്തിറക്കിയിട്ടുണ്ട്. സാധാരണ ഈടാക്കാറുള്ള 1,000 രൂപ ഇൻസ്റ്റലേഷൻ ചാർജ് ഈ പ്ലാനിൽ ഈടാക്കില്ല.
ജൂണിൽ താരിഫ് വർധിപ്പിച്ചതോടെ നിരവധി ഉപയോക്താക്കളാണ് ജിയോ ഉപേക്ഷിച്ച് ബിഎസ്എൻഎല്ലിലേക്ക് മാറിയത്. ടെലികോം റെഗുലേറ്ററി അതോറിറ്റി ഓഫ് ഇന്ത്യയുടെ സെപ്റ്റംബറിലെ കണക്കു പ്രകാരം ജിയോക്ക് 79 ലക്ഷം ഉപയോക്താക്കളെയാണ് നഷ്ടമായത്. വോഡഫോണിന് 15 ലക്ഷം കസ്റ്റമേഴ്സിനെയും എയർടെല്ലിന് 14 ലക്ഷം കസ്റ്റമേഴ്സിനെയും നഷ്ടമായി. ബിഎസ്എൻഎൽ മാത്രമാണ് സെപ്റ്റംബറിൽ രാജ്യത്തെ പുതിയ കസ്റ്റമേഴ്സിന്റെ എണ്ണത്തിൽ വളർച്ച നേടിയത്. 8.49 ലക്ഷം പുതിയ ഉപയോക്താക്കളെയാണ് കുറഞ്ഞ സമയത്തിനുള്ളിൽ ബിഎസ്എൻഎൽ സ്വന്തമാക്കിയത്.
Story Highlights: Reliance Jio introduces new plan offering unlimited 5G data for a year at Rs 601 to win back customers who switched to BSNL
