കേന്ദ്ര ധനമന്ത്രി നിർമല സീതാരാമനുമായി നാളെ വൈകുന്നേരം 3:30ന് കൂടിക്കാഴ്ച നടത്താൻ ഡൽഹിയിലെ പ്രതിനിധി കെവി തോമസ് ഒരുങ്ങുന്നു. മുണ്ടക്കൈ, ചൂരൽമല ഉരുൾപൊട്ടൽ ദുരന്തത്തിൽ പ്രത്യേക പാക്കേജ് ഉൾപ്പെടെയുള്ള വിഷയങ്ങളാണ് ചർച്ചയ്ക്ക് വരുന്നത്. പാക്കേജുമായി ബന്ധപ്പെട്ട എല്ലാ രേഖകളും സർക്കാർ കൈമാറിയിട്ടുണ്ടെന്നും ചർച്ച പ്രതീക്ഷയോടെയാണ് കാണുന്നതെന്നും കെ.വി തോമസ് വ്യക്തമാക്കി.
വയനാട് പാക്കേജ്, കേരളത്തിന്റെ കടമെടുപ്പ് പരിധി തുടങ്ങിയ വിഷയങ്ങൾ കേന്ദ്ര ധനമന്ത്രാലയത്തിന്റെ മുൻപിലുണ്ട്. കേരളം ഔദാര്യമല്ല ചോദിക്കുന്നതെന്നും 2000 കോടി രൂപയാണ് ആവശ്യപ്പെടുന്നതെന്നും കെവി തോമസ് പറഞ്ഞു. കേന്ദ്രം പ്രതികൂല സമീപനം സ്വീകരിക്കുമെന്ന് കരുതുന്നില്ലെന്നും അദ്ദേഹം കൂട്ടിച്ചേർത്തു. മഹാദുരന്തത്തിൽ സാമ്പത്തിക സഹായം നൽകേണ്ട ബാധ്യത കേന്ദ്രസർക്കാരിനുണ്ടെന്നും മറ്റ് സംസ്ഥാനങ്ങൾക്ക് സഹായം നൽകിയതുപോലെ കേരളത്തിനും ന്യായമായി ലഭിക്കേണ്ട സഹായമാണ് ചോദിക്കുന്നതെന്നും അദ്ദേഹം വ്യക്തമാക്കി.
എന്നാൽ, വയനാട് മുണ്ടക്കൈ-ചൂരൽമല ദുരന്തത്തിന് ശേഷം സംസ്ഥാനം സഹായം ആവശ്യപ്പെട്ടത് ഈ മാസം 13ന് മാത്രമാണെന്ന് കേന്ദ്രസർക്കാർ ഹൈക്കോടതിയിൽ സത്യവാങ്മൂലം നൽകിയിരുന്നു. കേരളം 2219.033 കോടി രൂപയുടെ സഹായമാണ് ആവശ്യപ്പെട്ടതെന്നും എസ്ഡിആർഎഫിലേക്ക് 153 കോടി രൂപ അനുവദിച്ചതായും കേന്ദ്രസർക്കാർ വ്യക്തമാക്കി. ദുരന്തത്തിന് ശേഷം പണം അനുവദിക്കുന്നതിൽ ചട്ടപ്രകാരമുള്ള നടപടികൾ പുരോഗമിക്കുന്നുവെന്നാണ് കേന്ദ്രം കോടതിയിൽ അറിയിച്ചത്.
Story Highlights: KV Thomas to meet Union Finance Minister Nirmala Sitharaman to discuss special package for Mundakkai, Churalmala landslide disaster
