ചേലക്കര ഉപതിരഞ്ഞെടുപ്പിൽ യുഡിഎഫ് സ്ഥാനാർഥിയായിരുന്ന രമ്യ ഹരിദാസ് തോൽവി സമ്മതിച്ചു. അന്തിമ ഫലപ്രഖ്യാപനത്തിന് ശേഷം മാധ്യമങ്ങളോട് പ്രതികരിച്ച രമ്യ, ചേലക്കരയിൽ നടന്നത് രാഷ്ട്രീയ പോരാട്ടമാണെന്ന് പറഞ്ഞു. യുഡിഎഫിന്റെ കൃത്യമായ പ്രവർത്തനങ്ള് നടന്നിട്ടുണ്ടെന്നും, തിരഞ്ഞെടുപ്പ് പ്രചാരണത്തിന് നേതൃത്വം നൽകിയ പാർട്ടിയോടും മുന്നണിയോടും ഹൃദയത്തിൽ നിന്ന് നന്ദിയുണ്ടെന്നും അവർ കൂട്ടിച്ചേർത്തു.
സഹപ്രവർത്തകർ രണ്ടു മാസത്തോളം നടത്തിയ കഠിനമായ പ്രവർത്തനത്തിനും രമ്യ നന്ദി പറഞ്ഞു. വരാൻ പോകുന്ന നാളുകളിലും കോൺഗ്രസിന്റെ പ്രവർത്തകയായി ഇവിടെ തന്നെ ഉണ്ടാകുമെന്നും അവർ വ്യക്തമാക്കി. എന്നാൽ, പോളിംഗ് ബൂത്തിൽ നിന്ന് പുറത്തിറങ്ങിയ രമ്യയെ എൽഡിഎഫ് പ്രവർത്തകർ നാടൻ പാട്ടുപാടി കളിയാക്കിയാണ് മടക്കി അയച്ചത്. രമ്യ സ്ഥിരം പാടുന്ന ‘കൈതോല പായ’ എന്ന പാട്ടുപാടിയാണ് പ്രവർത്തകരുടെ പരിഹാസം ഉണ്ടായത്.
എൽഡിഎഫ് സ്ഥാനാർത്ഥിയായ യുആർ പ്രദീപിന്റെ വിജയത്തോടുകൂടി ചെങ്കോട്ടയായ ചേലക്കര പിടിച്ചെടുക്കാമെന്ന യുഡിഎഫിന്റെ ആഗ്രഹമാണ് നനഞ്ഞപ്പടക്കം പോലെ ആയത്. 52,137 വോട്ടുകളാണ് ചേലക്കരയിൽ രമ്യ നേടിയത്. രമ്യ ഹരിദാസിലൂടെ മണ്ഡലം തിരിച്ചു പിടിക്കാനായിരുന്നു കോൺഗ്രസ് നീക്കം. എന്നാൽ, തുടക്കം മുതൽ അവസാനം വരെ എതിരാളികൾക്ക് മുന്നേറാൻ അവസരം നൽകാതെയാണ് എൽഡിഎഫ് സ്ഥാനാർത്ഥിയായ യുആർ പ്രദീപ് ചേലക്കരയിൽ മുന്നേറിയത്. 12,122 വോട്ടുകളുടെ ഭൂരിപക്ഷത്തിനാണ് യു ആർ പ്രദീപ് വിജയിച്ചത്. പ്രദീപ് നേടിയ വോട്ടുകൾ 64,259 ആണ്.
Story Highlights: Remya Haridas, UDF candidate in Chelakkara by-election, concedes defeat and thanks party workers for their efforts.
