Malappuram native wins Infosys Prize for Islamic maritime history

സാമൂഹിക ശാസ്ത്ര – മാനവിക വിഭാഗത്തിൽ ഇൻഫോസിസ് പ്രൈസിന് അർഹനായി മലപ്പുറം സ്വദേശിയായ മലയാളി. യുകെ എഡിൻബർഗ് യൂണിവേഴ്സിറ്റി ലക്ചററും ചരിത്രകാരനുമായ പെരിന്തൽമണ്ണ പനങ്ങാങ്ങര സ്വദേശി മഹ്മൂദ് കൂരിയയാണ് പുരസ്കാരത്തിന് അർഹനായത്. സ്വർണമെഡലും ഒരു ലക്ഷം ഡോളറും (84 ലക്ഷം രൂപ) അടങ്ങുന്ന ഇൻഫോസിസ് സയൻസ് ഫൗണ്ടേഷൻ നൽകുന്ന അവാർഡ് ഇന്ത്യയിലെ അക്കാദമിക രംഗത്തെ ഏറ്റവും പ്രധാന ബഹുമതികളിലൊന്നാണ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

പൂർവാധുനിക കാലത്തെ ഇസ്ലാമിന്റെ സമുദ്രചരിത്രവുമായി ബന്ധപ്പെട്ട പഠനങ്ങൾക്കും സംഭാവനകൾക്കുമാണ് മഹ്മൂദിനെ പുരസ്കാരത്തിനായി തിരഞ്ഞെടുത്തതെന്ന് ഇൻഫോസിസ് പുരസ്കാര നിർണയ സമിതി അറിയിച്ചു. ഇന്ത്യൻ മഹാസമുദ്രത്തിന്റെ തീരപ്രദേശങ്ങളിൽ സാമൂഹിക സാമ്പത്തിക സാംസ്കാരിക മേഖലകളിൽ ഇസ്ലാമിക നിയമങ്ങൾ ചെലുത്തിയ സ്വാധീനമാണ് കൂരിയ പഠനവിധേയമാക്കിയത്. നാൽപത് വയസിൽ താഴെയുള്ള ഗവേഷകർക്കാണ് ഇൻഫോസിസിന്റെ സയൻസ് ഫൗണ്ടേഷൻ അവാർഡ് ഏർപ്പെടുത്തിയത്.

മലപ്പുറം പെരിന്തൽമണ്ണയിലെ പനങ്ങാങ്ങര സ്വദേശിയായ മഹ്മൂദ് കൂരിയ, ചെമ്മാട് ദാറുൽഹുദ ഇസ്ലാമിക് യൂനിവേഴ്സിറ്റി, കാലിക്കറ്റ് യൂനിവേഴ്സിറ്റി എന്നിവിടങ്ങളിൽ പഠിച്ചു. തുടർന്ന് ഡൽഹി ജവഹർലാൽ നെഹ്റു സർവകലാശാലയിൽ പിജിയും എംഫിലും പൂർത്തിയാക്കി. നെതർലൻഡ്സിലെ ലീഡൻ സർവകലാശാലയിൽനിന്ന് പിഎച്ച്ഡി നേടിയ അദ്ദേഹം, 2019ൽ മരുമക്കത്തായ പഠനത്തിന് നെതർലൻഡ് സർക്കാരിന്റെ രണ്ടു കോടി രൂപയുടെ വെനി ഗ്രാന്റും നേടിയിട്ടുണ്ട്. നീന ഗുപ്ത, വേദിക ഖേമനി, ശ്യാം ഗൊല്ലകോട്ട, സിദ്ധേഷ് കാമത്ത്, അരുൺ ചന്ദ്രശേഖർ എന്നിവരാണ് പുരസ്കാരം നേടിയ മറ്റുള്ളവർ.