പ്രണവ് മോഹൻലാൽ എന്നും വ്യത്യസ്തതകളുടെ തോഴനാണ്. താരപുത്രനായിട്ടും യാതൊരു പകിട്ടും പത്രാസ്സുമില്ലാത്ത അദ്ദേഹം, സിനിമകളിലുപരി മാധ്യമങ്ങളിൽ നിറയുന്നത് വ്യത്യസ്തമായ ജീവിതശൈലികൾ കൊണ്ടാണ്. ദീർഘമായ യാത്രകളും ലളിത ജീവിതവും പ്രണവിനെ താരങ്ങൾക്കിടയിലെ മറ്റൊരു താരമാക്കുന്നു.
ഇപ്പോൾ പ്രണവിനെക്കുറിച്ചുള്ള ഒരു വാർത്തയാണ് മാധ്യമങ്ങളിൽ നിറയുന്നത്. അദ്ദേഹത്തിന്റെ അമ്മ സുചിത്ര മോഹൻലാൽ ടൈംസ് ഓഫ് ഇന്ത്യയ്ക്ക് നൽകിയ വെളിപ്പെടുത്തലാണ് ചർച്ചയാകുന്നത്. പ്രണവ് ഇപ്പോൾ സ്പെയിനിലെ ഒരു ഫാമിൽ ജോലി ചെയ്യുന്നുവെന്നും, താമസവും ഭക്ഷണവും കിട്ടുമെങ്കിലും പൈസ കിട്ടാത്ത ജോലിയാണെന്നും സുചിത്ര പറഞ്ഞു. ആട്ടിൻകുട്ടിയേയോ കുതിരയെയോ നോക്കുന്ന ജോലിയായിരിക്കാമെന്നും അവർ കൂട്ടിച്ചേർത്തു.
പ്രണവ് ഒരു അമ്മ മകനാണെന്ന് എല്ലാവരും പറയുന്നുവെങ്കിലും, അവന് സ്വന്തമായ തീരുമാനങ്ങളുണ്ടെന്ന് സുചിത്ര വ്യക്തമാക്കി. രണ്ടു വർഷത്തിലൊരിക്കൽ ഒരു സിനിമ ചെയ്യാമെന്ന നിലപാടിലാണ് അവനെന്നും, വർഷത്തിൽ രണ്ട് സിനിമയൊക്കെ ചെയ്യാമെന്ന് പറഞ്ഞിട്ടും അവൻ കേൾക്കില്ലെന്നും അവർ പറഞ്ഞു. വാശിയൊന്നുമില്ലാത്ത പ്രണവ് തനിക്കിഷ്ടമുള്ളത് ചെയ്യുമെന്നും സുചിത്ര കൂട്ടിച്ചേർത്തു. ‘വർഷങ്ങൾക്കു ശേഷം’ ആണ് പ്രണവിന്റെ ഏറ്റവും ഒടുവിൽ റിലീസ് ചെയ്ത ചിത്രം. വിനീത് ശ്രീനിവാസൻ സംവിധാനം ചെയ്ത ഈ ചിത്രത്തിൽ ധ്യാൻ ശ്രീനിവാസനും പ്രധാന കഥാപാത്രത്തെ അവതരിപ്പിച്ചിരുന്നു.
Story Highlights: Pranav Mohanlal currently working on a farm in Spain, reveals mother Suchitra Mohanlal
