മണിരത്നവും കമല്‍ ഹാസനും 37 വര്‍ഷത്തിന് ശേഷം ഒന്നിക്കുന്ന ‘തഗ് ലൈഫ്’ 2025 ജൂണ്‍ 5ന് റിലീസ് ചെയ്യും

മണിരത്നവും കമല്‍ ഹാസനും 37 വര്‍ഷത്തിന് ശേഷം ഒന്നിക്കുന്ന ചിത്രമായ ‘തഗ് ലൈഫി’ന്റെ റിലീസ് തീയതി പ്രഖ്യാപിച്ചുകൊണ്ടുള്ള ടീസര്‍ പുറത്തുവന്നിരിക്കുകയാണ്. കമല്‍ ഹാസന്റെ പിറന്നാളിനോടനുബന്ധിച്ച് പുറത്തുവിട്ട ടീസറില്‍ 2025 ജൂണ്‍ അഞ്ചിന് ചിത്രം തിയേറ്ററുകളിലെത്തുമെന്ന് വ്യക്തമാക്കുന്നു. 10 വര്‍ഷത്തിന് ശേഷം കമല്‍ ഹാസന്‍ തിരക്കഥയെഴുതുന്ന ചിത്രം കൂടിയാണിത്. 24 വര്‍ഷത്തിന് ശേഷം എ.ആര്‍. റഹ്‌മാനും കമല്‍ ഹാസനും ഒന്നിക്കുന്നുവെന്ന പ്രത്യേകതയും ഈ സിനിമയ്ക്കുണ്ട്. തമിഴിന് പുറമെ തെലുങ്ക്, ഹിന്ദി, കന്നഡ, മലയാളം ഭാഷകളിലും ചിത്രം പുറത്തിറങ്ങും. കമല്‍ ഹാസനൊപ്പം സിലമ്പരസനും ചിത്രത്തില്‍ പ്രധാനവേഷത്തിലെത്തുന്നുണ്ട്. എസ്.ടി.ആര്‍. കമല്‍ ഹാസന്റെ മകനായി അഭിനയിക്കുന്നു. ടീസറിന്റെ ഒടുവില്‍ കമല്‍ ഹാസന്‍ ചെറുപ്പമായിട്ടുള്ള ലുക്കിലും പ്രത്യക്ഷപ്പെടുന്നുണ്ട്. അശോക് സെല്‍വന്‍, ജോജു ജോര്‍ജ്, അഭിരാമി, നാസര്‍, തൃഷ, ഐശ്വര്യ ലക്ഷ്മി, സന്താനഭാരതി തുടങ്ങിയവരും ‘തഗ് ലൈഫി’ന്റെ ഭാഗമാകുന്നുണ്ട്. പൊന്നിയിന്‍ സെല്‍വന് ശേഷം മണിരത്നം സംവിധാനം ചെയ്യുന്ന ചിത്രം കൂടിയാണിത്. Story Highlights: Kamal Haasan and Mani Ratnam reunite after 37 years for ‘Thug Life’, set to release on June 5, 2025