പാലക്കാട് ഉപതിരഞ്ഞെടുപ്പിന്റെ പശ്ചാത്തലത്തിൽ യുഡിഎഫ് നേതാക്കൾ താമസിക്കുന്ന ഹോട്ടലിൽ രാത്രി പൊലീസ് പരിശോധന നടത്തിയതിനെ തുടർന്ന് സംഘർഷാവസ്ഥ ഉടലെടുത്തു. കോൺഗ്രസ് നേതാക്കൾ ട്രോളി ബാഗിൽ പണം എത്തിച്ച് വിതരണം ചെയ്‌തെന്ന ആരോപണത്തെ തുടർന്നാണ് പൊലീസ് റെയ്ഡ് നടത്തിയത്. എന്നാൽ, വ്യാജ പരാതിയുടെ അടിസ്ഥാനത്തിലാണ് റെയ്ഡ് നടത്തുന്നതെന്ന് കോൺഗ്രസ് ആരോപിച്ചു.
പൊലീസ് പരിശോധനയ്ക്കെതിരെ കോൺഗ്രസ് നേതാക്കൾ രംഗത്തെത്തി. എല്ലാ റൂമും പരിശോധിച്ചിട്ട് പോയാൽ മതിയെന്ന് പൊലീസിനോട് അവർ ആവശ്യപ്പെട്ടു. തെരഞ്ഞെടുപ്പ് ഉദ്യോഗസ്ഥർ ഇല്ലാതെ പരിശോധന നടത്താൻ അനുവദിക്കില്ലെന്നും നേതാക്കൾ വ്യക്തമാക്കി. സംഘർഷാവസ്ഥ രൂക്ഷമായതോടെ പാലക്കാട് എ.എസ്.പി. അശ്വതി ജിജി സംഭവ സ്ഥലത്തെത്തി. ബിജെപി-സിപിഐഎം നേതാക്കളും ഹോട്ടലിൽ എത്തിയിരുന്നു.
ഷാനി മോൾ ഉസ്മാന്റെയും ബിന്ദു കൃഷ്ണയുടെയും മുറികളിലാണ് പ്രധാനമായും പരിശോധന നടത്തിയത്. എന്നാൽ, ഷാനി മോൾ ഉസ്മാന്റെ മുറിയിൽ നടത്തിയ പരിശോധനയിൽ ഒന്നും കണ്ടെത്താൻ കഴിഞ്ഞില്ലെന്ന് പൊലീസ് റിപ്പോർ‌ട്ട് പുറത്തുവന്നു. എന്നാൽ, കോൺഗ്രസ് നേതാക്കൾ‌ക്ക് എന്തിനാണ് ബേജാറാകുന്നതെന്നും എല്ലാ റൂമുകളും പരിശോധിച്ച് ആശങ്ക മാറ്റട്ടെയെന്നും എൻഡിഎ സ്ഥാനാർഥി സി കൃഷ്ണകുമാർ ചോദിച്ചു.
Story Highlights: Tension erupts in Palakkad hotel as police raid rooms of Congress leaders during by-election
