ചൈനയുടെ ടിയാങ്കോങ് ബഹിരാകാശ നിലയം ഭാവിയിലെ ബഹിരാകാശ ദൗത്യങ്ങളുടേയും ഗവേഷണങ്ങളുടേയും കേന്ദ്രമായി മാറാൻ ഒരുങ്ങുകയാണ്. 2031-ൽ രാജ്യാന്തര ബഹിരാകാശ നിലയം (ഐഎസ്എസ്) ഭൂമിയിൽ തിരിച്ചിറക്കുന്നതോടെ, ഏക ബഹിരാകാശ നിലയമെന്ന സ്ഥാനം സ്വന്തമാക്കാനാണ് ചൈനയുടെ ലക്ഷ്യം. പുനരുപയോഗിക്കാവുന്ന മെങ്‌സൗ ബഹിരാകാശ പേടകം, സുന്‍ടിയാന്‍ ടെലസ്‌കോപ് തുടങ്ങിയ കൂടുതൽ ഘടകങ്ങൾ ചേർത്ത് നിലയത്തിന്റെ സൗകര്യങ്ങൾ വിപുലീകരിക്കാനും ചൈന പദ്ധതിയിടുന്നു.
അമേരിക്കയുടെ നേതൃത്വത്തിലുള്ള ഐഎസ്എസിൽ നിന്ന് ഒഴിവാക്കപ്പെട്ട ചൈന, സ്വന്തമായി ആരംഭിച്ച ബഹിരാകാശ നിലയമാണ് ടിയാങ്കോങ്. ചൈന മാൻഡ് സ്പേസ് ഏജൻസിയാണ് ഇതിന്റെ നിർമാണത്തിനും പരിപാലനത്തിനും പിന്നിൽ. ബഹിരാകാശത്തെ വൻശക്തിയാകാൻ അമേരിക്കയുമായി നേരിട്ട് എതിരിടുന്ന ഒരേയൊരു രാജ്യമായി ചൈന മാറിക്കഴിഞ്ഞു. ഉപഗ്രഹ വിക്ഷേപണം, ചാന്ദ്ര ഗവേഷണം, ബഹിരാകാശ നിലയം എന്നിവയിലെല്ലാം അമേരിക്കയ്ക്ക് ‘മെയ്ഡ് ഇൻ ചൈന’ മറുപടിയുണ്ട്.
ടിയാങ്കോങ് ബഹിരാകാശ നിലയത്തിലേക്കുള്ള ഏറ്റവും പുതിയ മനുഷ്യ ദൗത്യമായ ഷെൻഷു 19 ഒക്ടോബർ 29-ന് നടന്നു. ചൈനയുടെ ആദ്യ വനിതാ ബഹിരാകാശ സഞ്ചാരി ഉൾപ്പെടെ മൂന്ന് സഞ്ചാരികളെ നിലയത്തിലെത്തിച്ചു. ആറു മാസം ബഹിരാകാശത്ത് കഴിയുന്ന ഈ സംഘം 86 ഓളം ശാസ്ത്ര പരീക്ഷണങ്ങൾ നടത്തും. നിലവിൽ ഭൂമിയെ വലം വയ്ക്കുന്ന രണ്ട് ബഹിരാകാശ നിലയങ്ങളാണുള്ളത് – അമേരിക്കയുടെ നേതൃത്വത്തിലുള്ള ഐഎസ്എസും ചൈനയുടെ ടിയാങ്കോങും.
Story Highlights: China’s Tiangong space station set to become sole space station after ISS decommissioning in 2031, marking new era in space exploration
