മഹാരാഷ്ട്ര നിയമസഭാ തെരഞ്ഞെടുപ്പ് പ്രചാരണത്തിനിടെ, എൻ.സി.പി. അധ്യക്ഷൻ ശരദ് പവാർ തന്റെ രാഷ്ട്രീയ ജീവിതം അവസാനിപ്പിക്കുന്നതായി സൂചന നൽകി. ബരാമതിയിൽ നടന്ന പൊതുപരിപാടിയിൽ സംസാരിക്കവെ, വരാനിരിക്കുന്ന തിരഞ്ഞെടുപ്പുകളിൽ മത്സരിക്കില്ലെന്നും പുതുതലമുറയ്ക്ക് ആവശ്യമായ നിർദേശങ്ങൾ നൽകി മുന്നോട്ട് പോകുമെന്നും അദ്ദേഹം വ്യക്തമാക്കി. 2014 മുതൽ രാജ്യസഭാംഗമായ പവാറിന്റെ കാലാവധി 2026 ഏപ്രിലിൽ അവസാനിക്കും.
പതിനാല് തവണ മത്സരിച്ച് ജയിച്ച താൻ ഇനി ഒരു തിരഞ്ഞെടുപ്പിലും മത്സരിക്കില്ലെന്ന് പവാർ പറഞ്ഞു. എന്നാൽ പൊതുപ്രവർത്തനം അവസാനിപ്പിക്കുന്നില്ലെന്നും ജനങ്ങൾക്ക് വേണ്ടി പ്രവർത്തിക്കുമെന്നും അദ്ദേഹം വ്യക്തമാക്കി. നാല് തവണ മുഖ്യമന്ത്രിയായി സേവനമനുഷ്ഠിച്ച പവാർ, കേന്ദ്രത്തിൽ പ്രതിരോധം, കൃഷി തുടങ്ങിയ വകുപ്പുകളും കൈകാര്യം ചെയ്തിട്ടുണ്ട്. 1999-ൽ എൻ.സി.പി. രൂപീകരിച്ച അദ്ദേഹം, 2023-ൽ പാർട്ടി പിളർന്നപ്പോൾ തന്റെ നേതൃത്വത്തിലുള്ള വിഭാഗവുമായി ഇന്ത്യ സഖ്യത്തിനൊപ്പം ചേർന്ന് മഹാരാഷ്ട്ര തിരഞ്ഞെടുപ്പിനെ നേരിടുന്നു.
വരാനിരിക്കുന്ന മഹാരാഷ്ട്ര നിയമസഭാ തിരഞ്ഞെടുപ്പിൽ അനന്തരവൻ അജിത് പവാറുമായി നേരിട്ട് ഏറ്റുമുട്ടുമ്പോൾ, ഏത് എൻ.സി.പി.യെ ആയിരിക്കും ജനം പിന്തുണയ്ക്കുക എന്നതാണ് ഉയരുന്ന ചോദ്യം. ബാരാമതിയിൽ നിന്ന് അഞ്ച് തവണ എം.എൽ.എ. ആയിരുന്ന അജിത് പവാർ, ഇത്തവണ എൻ.ഡി.എ. പക്ഷത്തുനിന്ന് സ്വന്തം കരുത്തിൽ മത്സരിക്കുന്നു. ശരദ് പവാർ വിഭാഗം യുഗേന്ദ്ര പവാറിനെയാണ് അജിതിനെതിരെ നിർത്തിയിരിക്കുന്നത്. ബാരാമതി ലോക്സഭാ മണ്ഡലത്തിൽ നടന്ന ‘പവാർ’ പോരാട്ടത്തിൽ ശരദ് പവാറിന്റെ മകൾ സുപ്രിയ സുളെ അജിത് പവാറിന്റെ ഭാര്യ സുനേത്ര പവാറിനെ പരാജയപ്പെടുത്തിയിരുന്നു.
Story Highlights: NCP chief Sharad Pawar hints at retirement from active politics, says he won’t contest future elections
