മാഞ്ചസ്റ്റർ യുണൈറ്റഡ് എന്ന ഇംഗ്ലീഷ് ക്ലബ് റൂബൻ അമോറിനെ പുതിയ പരിശീലകനായി നിയമിക്കാൻ ഒരുങ്ങുകയാണ്. പെപ് ഗാർഡിയോളയുടെ പകരക്കാരനായി മാഞ്ചസ്റ്റർ സിറ്റി നോട്ടമിട്ടിരുന്ന അമോറിനെ കുറിച്ചാണ് സോക്കർ ലോകത്തെ ചർച്ച. ജുർഗൻ ക്ലോപ്പിനും പെപ് ഗാർഡിയോളക്കും പിൻഗാമിയായി കാണാൻ മാത്രം വലിപ്പമുള്ള പരിശീലകനാണ് അമോറിം.
സ്പോർട്ടിംഗ് ലിസ്ബൺ എന്ന ക്ലബ്ബിന്റെ പരിശീലകനായിരിക്കെയാണ് അമോറിം യുണൈറ്റഡിലേക്ക് എത്തുന്നത്. പോർച്ചുഗീസ് ലീഗിൽ ബെൻഫിക്കയുടെയും പോർട്ടോയുടെയും ആധിപത്യം തകർത്ത് സ്പോർട്ടിംഗിന്റെ നഷ്ടപ്പെട്ട പ്രതാപം വീണ്ടെടുത്ത പുലിയാണ് ഇദ്ദേഹം. 19 വർഷത്തിനിടെ ക്ലബ്ബിന്റെ ആദ്യ ചാമ്പ്യൻഷിപ്പ് വിജയമായ 2021-ലെ ‘പ്രൈമിറ ലിഗ’ കിരീടത്തിലേക്ക് സ്പോർട്ടിംഗിനെ നയിച്ചു.
14 അന്താരാഷ്ട്ര മത്സരങ്ങളിൽ പോർച്ചുഗൽ ജഴ്സിയണിഞ്ഞ അമോറിം 2003-ൽ പോർച്ചുഗീസ് ഒന്നാം ഡിവിഷൻ ക്ലബ്ബായ ബെലെനെൻസസിൽ അരങ്ങേറ്റം കുറിച്ചു. പരിക്കിനെ തുടർന്ന് 32-ാം വയസിൽ വിരമിച്ച അദ്ദേഹം പരിശീലന യോഗ്യതകൾ പൂർത്തിയാക്കി. 2019 ഡിസംബറിൽ ബ്രാഗയുടെ മുഖ്യ പരിശീലകനായി. ഇപ്പോൾ യൂറോപ്പിൽ ഏറ്റവും കൂടുതൽ റേറ്റിങ് ഉള്ള പരിശീലകരിൽ ഒരാളായി മാറിയിരിക്കുകയാണ് ഈ പോർച്ചുഗീസ് മാനേജർ.
Story Highlights: Manchester United set to appoint Ruben Amorim as new manager, highly rated Portuguese coach who led Sporting to league title
