അമേരിക്കയിലെ പ്രസിഡന്റ് തെരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടന്നിരിക്കുകയാണ്. ഡെമോക്രാറ്റിക് സ്ഥാനാര്‍ഥി കമല ഹാരിസും റിപ്പബ്ലിക്കന്‍ സ്ഥാനാര്‍ഥി ഡൊണാള്‍ഡ് ട്രംപും ഇഞ്ചോടിഞ്ച് പോരാട്ടം നടത്തുന്ന സംസ്ഥാനങ്ങളില്‍ ശ്രദ്ധ കേന്ദ്രീകരിച്ച് പ്രചാരണം നടത്തുകയാണ്. അഭിപ്രായ സര്‍വേകളില്‍ ഇരുവരും ഒപ്പത്തിനൊപ്പമാണെന്നത് തെരഞ്ഞെടുപ്പിന്റെ ആവേശം കൂട്ടുന്നു.
കമല ഹാരിസ് നോര്‍ത്ത് കാരോലിന, പെന്‍സില്‍വാനിയ, വിസ്‌കോണ്‍സിന്‍ എന്നീ സുപ്രധാന സംസ്ഥാനങ്ങളില്‍ പര്യടനം നടത്തി. മുന്‍ കാലിഫോര്‍ണിയ ഗവര്‍ണറും സിനിമാതാരവുമായ അര്‍ണോള്‍ഡ് ഷ്വാസ്‌നെഗ്ഗര്‍ കമല ഹാരിസിന് പിന്തുണ പ്രഖ്യാപിച്ചു. അരിസോണ, നെവാഡ സംസ്ഥാനങ്ങളില്‍ നാളെ കമല ഹാരിസ് റാലി നടത്തും. അതേസമയം, ട്രംപ് പെന്‍സില്‍വാനിയ, വിസ്‌കോണ്‍സിന്‍ എന്നിവിടങ്ങളില്‍ ശ്രദ്ധ കേന്ദ്രീകരിച്ച് സ്ത്രീ സുരക്ഷയിലൂന്നിയ പ്രചാരണം നടത്തുകയാണ്.
ട്രംപിന്റെ അനുയായികളെ മാലിന്യമെന്ന് വിശേഷിപ്പിച്ച ജോ ബൈഡന്റെ പ്രസ്താവന റിപ്പബ്ലിക്കന്‍ പാര്‍ട്ടി ആയുധമാക്കി. മാലിന്യ ട്രക്കില്‍ പ്രചാരണത്തിനെത്തിയാണ് ട്രംപ് ബൈഡനു മറുപടി നല്‍കിയത്. അതേസമയം, ട്രംപിന്റെ അനുയായിയായ ഇലോണ്‍ മസ്‌കിന്റെ പിന്തുണയുള്ള സംഘം കമല ഹാരിസിനെ ലക്ഷ്യമാക്കി വ്യാജ പരസ്യങ്ങള്‍ നല്‍കുന്നതായി ഫേസ്ബുക് കണ്ടെത്തി. അവസാന ദിനങ്ങളില്‍ നടത്തിയ അഭിപ്രായ വോട്ടെടുപ്പുകളില്‍ ആര്‍ക്കും മുന്‍തൂക്കമില്ലാത്തത് തെരഞ്ഞെടുപ്പിനെ ആവേശകരമായ ക്ലൈമാക്‌സിലേക്ക് നയിക്കുന്നു.
Story Highlights: US Presidential Election 2024 heats up with Trump and Kamala Harris focusing on swing states
