തമിഴക വെട്രിക് കഴകം (ടിവികെ) തങ്ങളുടെ പാർട്ടി നയം പ്രഖ്യാപിച്ചു. സമൂഹ്യ നീതി, സമത്വം, മതേതരത്വം എന്നിവയാണ് പാർട്ടിയുടെ അടിസ്ഥാന തത്വങ്ങൾ. സ്ത്രീ സമത്വത്തിന് പ്രത്യേക ഊന്നൽ നൽകുമെന്നും മൂന്നിൽ ഒന്ന് സ്ഥാനങ്ങൾ സ്ത്രീകൾക്ക് നൽകുമെന്നും, ഇത് പിന്നീട് അൻപത് ശതമാനമായി ഉയർത്തുമെന്നും പാർട്ടി വ്യക്തമാക്കി.
തമിഴ്നാട്ടിൽ ഹിന്ദി വേണ്ടെന്ന നിലപാട് ടിവികെ സ്വീകരിച്ചു. സംസ്ഥാനത്ത് തമിഴും ഇംഗ്ലീഷും മതിയെന്നാണ് പാർട്ടിയുടെ അഭിപ്രായം. കൂടുതൽ വ്യവസായങ്ങൾ തമിഴ്നാട്ടിൽ എത്തിക്കുമെന്നും ജാതി സെൻസസ് നടത്തി സമൂഹനീതി ഉറപ്പ് വരുത്തുമെന്നും നയപ്രഖ്യാപനത്തിൽ പറഞ്ഞു. മധുരയിൽ ഭരണകേന്ദ്രം സ്ഥാപിക്കുമെന്നും പ്രഖ്യാപിച്ചു.
വിഴുപ്പുറം വിക്രവാണ്ടിയിലെ കൂറ്റൻവേദിയിൽ നടന്ന ടിവികെയുടെ ആദ്യ സമ്മേളനത്തിൽ രണ്ടര ലക്ഷത്തോളം പ്രവർത്തകർ പങ്കെടുത്തു. വേർതിരിവുകൾ ഒഴിവാക്കി സമത്വത്തിന്റെ ആശയത്തിൽ മുന്നോട്ട് പോകുമെന്ന് പാർട്ടി പ്രതിജ്ഞ ചെയ്തു. നടൻ വിജയ് 100 അടി ഉയരത്തിൽ പാർട്ടി കൊടി ഉയർത്തി. അടുത്ത 10 വർഷത്തേയ്ക്ക് ഈ കൊടി സമ്മേളന വേദിയിൽ നിലനിർത്തും.
Story Highlights: Actor Vijay’s Tamilaga Vettri Kazhagam announces party policy focusing on social justice, equality, and secularism
