ഗിരീഷ് എ ഡി- നസ്ലെന്‍ ടീമിന്റെ പുതിയ ചിത്രമായ ‘ഐ ആം കാതലന്‍’ എന്ന സിനിമയുടെ ട്രെയ്‌ലർ പുറത്തിറങ്ങി. റൊമാന്‍റിക് കോമഡി ചിത്രങ്ങളുടെ ട്രാക്കിൽ നിന്നും മാറി, ഈ കൂട്ടുകെട്ട് ഒരുക്കുന്നത് ഒരു സൈബർ ത്രില്ലർ ആണെന്നാണ് ട്രെയ്‌ലർ സൂചിപ്പിക്കുന്നത്. നസ്ലൻ ഈ ചിത്രത്തിൽ കമ്പ്യൂട്ടർ ഹാക്കറിന്‍റെ വേഷത്തിലാണ് എത്തുന്നത്.
അനിഷ്മയാണ് ചിത്രത്തിലെ നായിക. ദിലീഷ് പോത്തന്‍, ലിജോമോള്‍, ടി ജി രവി, സജിന്‍, വിനീത് വാസുദേവന്‍, വിനീത് വിശ്വം എന്നിവരാണ് മറ്റ് പ്രധാന താരങ്ങള്‍. പ്രശസ്ത നടനായ സജിന്‍ ചെറുകയിലാണ് തിരക്കഥ രചിച്ചിരിക്കുന്നത്. ശരണ്‍ വേലായുധന്‍ ഛായാഗ്രഹണം നിർവഹിച്ചിരിക്കുന്നു. ആകാശ് ജോസഫ് വര്‍ഗീസ് എഡിറ്റിംഗ് നിര്‍വഹിച്ചു. സംഗീതം ഒരുക്കിയിരിക്കുന്നത് സിദ്ധാര്‍ത്ഥ പ്രദീപ് ആണ്.
ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലനും, ഡോ. പോള്‍സ് എന്‍റര്‍ടെയിന്മെന്‍റ്സിന്‍റെ ബാനറില്‍ ഡോ. പോള്‍ വര്‍ഗീസ്, കൃഷ്ണമൂര്‍ത്തി എന്നിവരുമാണ് ചിത്രം നിര്‍മ്മിച്ചിരിക്കുന്നത്. ഇന്ത്യ മൊത്തം തരംഗം സൃഷ്ടിച്ച പ്രേമലു എന്ന ബ്ലോക്ക്ബസ്റ്ററിനും തണ്ണീര്‍ മത്തന്‍ ദിനങ്ങള്‍, സൂപ്പര്‍ ശരണ്യ എന്നീ സൂപ്പര്‍ ഹിറ്റുകള്‍ക്കും ശേഷമാണ് ഗിരീഷ് എ ഡി- നസ്ലെന്‍ ടീം ഈ പുതിയ ചിത്രവുമായി എത്തുന്നത്.
Story Highlights: Trailer of ‘I Am Kathalan’, a cyber thriller starring Naslen as a computer hacker, directed by Girish AD, has been released.
