ഗസ്സയില്‍ കൊല്ലപ്പെട്ട ക്രിസ്ത്യന്‍ ഇസ്രയേലി സൈനികനായ ഡേവിഡ് ബോഗ്ഡാനോവ്‌സ്‌കിയുടെ ശവകുടീരത്തിലെ കുരിശ് മറച്ചതായി റിപ്പോര്‍ട്ടുകള്‍ പുറത്തുവന്നിരിക്കുകയാണ്. ഹൈഫ മിലിറ്ററി സെമിത്തേരിയില്‍ അടക്കം ചെയ്ത സൈനികന്റെ ശവകുടീരത്തില്‍ സ്ഥാപിച്ച കുരിശ് നീക്കം ചെയ്യണമെന്നോ അല്ലെങ്കില്‍ മൃതദേഹം മാറ്റണമെന്നോ പ്രതിരോധ മന്ത്രാലയം ഉത്തരവിട്ടിരുന്നു. ജൂതരുടെ ശക്തമായ എതിര്‍പ്പിനെ തുടര്‍ന്നാണ് ഈ നടപടി.
ശവകുടീരത്തിലെ കുരിശ് തങ്ങളുടെ വിശ്വാസത്തിനെതിരാണെന്നും സെമിത്തേരിയില്‍ പ്രാര്‍ത്ഥിക്കാനുള്ള അവകാശം ഹനിക്കുന്നതാണെന്നും ചില ജൂത കുടുംബങ്ങള്‍ പരാതിപ്പെട്ടിരുന്നു. എന്നാല്‍ കൊല്ലപ്പെട്ട സൈനികന്റെ കുടുംബം ഇതിനെ ശക്തമായി എതിര്‍ത്തു. കുരിശടയാളം തങ്ങളുടെ പുത്രന്റെ വ്യക്തിത്വത്തിന്റേയും വിശ്വാസത്തിന്റേയും അടയാളമാണെന്ന് അവര്‍ ചൂണ്ടിക്കാട്ടി. കുരിശ് മറച്ചുവച്ചിരിക്കുന്നത് കണ്ടപ്പോള്‍ തങ്ങള്‍ക്ക് അപമാനം തോന്നിയെന്നും കുടുംബം പ്രതികരിച്ചു.
ഇസ്രയേലി ആര്‍മി ചീഫ് റാബിയുടെ അഭിപ്രായത്തില്‍, ശവകുടീരത്തില്‍ കുരിശടയാളം സ്ഥാപിക്കുന്നത് സെമിത്തേരിയുടെ വിശുദ്ധതയെ കളങ്കപ്പെടുത്തുന്നതാണ്. സൈനിക സെമിത്തേരിയില്‍ മതപരമായ ചിഹ്നങ്ങള്‍ വയ്ക്കുന്നതിന് നിയമപരമായി എതിര്‍പ്പുണ്ടെന്നും, ജൂത സൈനികരുടെ മൃതദേഹങ്ങളും അവിടെ അടക്കിയിരിക്കുന്നതിനാല്‍ ഇത് ഒഴിവാക്കേണ്ടതാണെന്നും പ്രതിരോധ മന്ത്രാലയം വ്യക്തമാക്കി. 2013 മുതല്‍ ജൂതരല്ലാത്ത സൈനികരുടെ മൃതദേഹങ്ങളും സൈനിക സെമിത്തേരിയില്‍ അടക്കാമെന്ന ഉത്തരവ് നിലവിലുണ്ട്. നിലവില്‍ ബോഗ്ഡാനോവ്‌സ്‌കിയുടെ ശവകുടീരത്തിലെ കുരിശ് കറുത്ത തുണി കൊണ്ട് മറച്ചിരിക്കുകയാണ്.
Story Highlights: Christian Israeli soldier’s family ordered to remove cross from headstone in military cemetery due to Jewish objections.
