ബംഗ്ലാദേശിലെ ഇടക്കാല സർക്കാർ അവാമി ലീഗ് പാർട്ടിയുടെ വിദ്യാർത്ഥി സംഘടനയായ ബംഗ്ലാദേശ് ഛത്ര ലീഗിനെ നിരോധിച്ചു. തീവ്രവാദി സംഘടനയെന്ന് കുറ്റപ്പെടുത്തിയാണ് ഭരണകൂടത്തിൻ്റെ ഈ നടപടി. അധികാരത്തിൽ നിന്ന് പുറത്താക്കപ്പെട്ട മുൻ പ്രധാനമന്ത്രി ഷെയ്ഖ് ഹസീനയുടെ പാർട്ടിയുമായി ബന്ധപ്പെട്ട സംഘടനയായിരുന്നു ഇത്.
കഴിഞ്ഞ 15 വർഷത്തിനിടെ ഗുരുതര നിയമ ലംഘനങ്ങൾ നടത്തിയ സംഘടനയാണ് ബംഗ്ലാദേശ് ഛത്ര ലീഗ് എന്ന് ഭരണകൂടം വിമർശിച്ചു. ഇന്നലെയാണ് സർക്കാർ ഉത്തരവ് പുറത്തിറക്കിയതും അത് നിലവിൽ വന്നതും. രാജ്യത്ത് വിവേചനത്തിനെതിരായ വിദ്യാർത്ഥി കൂട്ടായ്മ മുന്നോട്ട് വെച്ച അഞ്ച് ആവശ്യങ്ങളിൽ ഒന്നായിരുന്നു ഈ നിരോധനം.
നിലവിലെ ഭരണഘടന റദ്ദാക്കുക, പ്രസിഡൻ്റ് മുഹമ്മദ് ഷഹാബുദ്ദീനെ പുറത്താക്കുക, ബി.സി.എല്ലിനെ നിരോധിക്കുക തുടങ്ങിയ ആവശ്യങ്ങളാണ് വിദ്യാർത്ഥി സംഘടനകൾ ഉന്നയിച്ചത്. ഈ സാഹചര്യത്തിലാണ് ഇടക്കാല സർക്കാർ ബംഗ്ലാദേശ് ഛത്ര ലീഗിനെതിരെ കർശന നടപടി സ്വീകരിച്ചത്.
Story Highlights: Bangladesh interim government bans student wing of ousted Sheikh Hasina’s party, citing extremist activities
