വാട്സ്ആപ്പ് വീഡിയോ കോളുകളിൽ പുതിയ അപ്ഡേറ്റുമായി എത്തിയിരിക്കുകയാണ്. ലോ ലൈറ്റ് മോഡ് എന്ന പുതിയ ഫീച്ചറാണ് ഇപ്പോൾ അവതരിപ്പിച്ചിരിക്കുന്നത്. വെളിച്ചം കുറഞ്ഞ സ്ഥലങ്ങളിൽ നിന്ന് വീഡിയോ കോൾ ചെയ്യുമ്പോൾ വീഡിയോയുടെ ഗുണനിലവാരം മെച്ചപ്പെടുത്തുകയാണ് ഈ ഫീച്ചറിന്റെ ലക്ഷ്യം. ഫീച്ചർ ഓണാക്കുമ്പോൾ ഫ്രെയിമിന്റെ മൊത്തത്തിലുള്ള തെളിച്ചം കൂടും.
ലോ-ലൈറ്റ് മോഡ് സെറ്റ് ചെയ്യാൻ വീഡിയോ കോളിൽ മുകളിൽ വലത് വശത്തുള്ള ‘ബൾബ്’ ലോഗോയിൽ ടാപ്പ് ചെയ്താൽ മതി. ആവശ്യമില്ലെങ്കിൽ ഇത് ഓഫ് ചെയ്യാനും സാധിക്കും. ഓരോ വാട്സ്ആപ്പ് കോളിനും ഈ ഫീച്ചർ പ്രത്യേകം ഓണാക്കേണ്ടതുണ്ട്. ആപ്പിന്റെ ഐഒഎസ്, ആൻഡ്രോയിഡ് പതിപ്പുകളിൽ ലോ ലൈറ്റ് മോഡ് ലഭ്യമാണ്. എന്നാൽ വിൻഡോസ് വാട്സ്ആപ്പ് ആപ്പിൽ ഈ ഫീച്ചർ ലഭ്യമല്ല, എങ്കിലും വിൻഡോസ് പതിപ്പിലും തെളിച്ചം വർധിപ്പിക്കാൻ സാധിക്കും.
വീഡിയോ കോളുകൾക്കായി വാട്സ്ആപ്പ് ക്യാമറ ഫിൽട്ടറുകളും ആകർഷകമായ ബാക്ക്ഗ്രൗണ്ടുകളും കൊണ്ടുവന്നിട്ടുണ്ട്. ബ്ലാക്ക് ആൻഡ് വൈറ്റ്, വാം, കൂൾ, പ്രിസം ലൈറ്റ്, ലൈറ്റ് ലീക്ക്, ഡ്രീമി, ഫിഷ്ഐ, വിന്റേജ് ടിവി, ഫ്രോസ്റ്റഡ് ഗ്ലാസ് തുടങ്ങിയ ഫിൽട്ടറുകളാണ് വീഡിയോ കോളിൽ ഉൾപ്പെടുത്തിയിരിക്കുന്നത്. ബാക്ക്ഗ്രൗണ്ടുകളിൽ ബ്ലർ, ലിവിംഗ് റൂം, ഓഫീസ്, കഫെ, പെബിൾസ്, ഫുഡീ, സ്മൂഷ്, ബീച്ച്, സൺസെറ്റ്, സെലിബ്രേഷൻ, ഫോറസ്റ്റ് എന്നിവ ഉൾപ്പെടുന്നു. ഇവ വ്യക്തിഗത കോളുകളിലും ഗ്രൂപ്പ് കോളുകളിലും ഉപയോഗിക്കാവുന്നതാണ്. കൂടാതെ ബ്രൈറ്റ്നെസ് കൂട്ടാനുള്ള ടച്ച് അപ്, ലോ ലൈറ്റ് എന്നീ ഓപ്ഷനുകളും ലഭ്യമാണ്. ഇത്തരം ഫീച്ചറുകൾ വീഡിയോ കോളുകൾക്ക് പുതിയ അനുഭവം നൽകും.
Story Highlights: WhatsApp introduces new Low Light Mode feature for improved video call quality in low-light conditions
