ഇന്ത്യക്കാരുടെ ജീവിതത്തിൽ സ്ഥിരം സാന്നിധ്യമായി മാറിയ ടാറ്റ ഗ്രൂപ്പിന്റെ സുവർണകാലമായിരുന്നു രത്തൻ ടാറ്റയുടെ കാലഘട്ടം. 1991 മുതൽ 2012 വരെ രത്തൻ ടാറ്റ തന്റെ സാമ്രാജ്യത്തെ മുന്നോട്ട് നയിച്ചു. 1960-ൽ ഇന്ത്യയിലേക്ക് മടങ്ങിയെത്തിയ രത്തൻ ടാറ്റ, ജംഷേദ്പൂരിലെ ടാറ്റ സ്റ്റീൽ ഡിവിഷനിൽ തന്റെ കരിയർ ആരംഭിച്ചു. 1991-ൽ ടാറ്റ ഗ്രൂപ്പിന്റെ തലപ്പത്തേക്ക് എത്തിയ അദ്ദേഹം, 2012 ഡിസംബർ 28 വരെ ആ സ്ഥാനത്ത് തുടർന്നു.
രത്തൻ ടാറ്റയുടെ നേതൃത്വത്തിൽ, ടാറ്റ ഗ്രൂപ്പ് അന്താരാഷ്ട്ര തലത്തിൽ പ്രശസ്തി നേടി. ആംഗ്ലോ ഡച്ച് സ്റ്റീൽ നിർമാതാക്കളായ കോറസ്, ബ്രിട്ടീഷ് വാഹന കമ്പനി ജാഗ്വർ ലാൻഡ് റോവർ, ബ്രിട്ടീഷ് ടീ കമ്പനി ടെറ്റ്‌ലി എന്നിവയുമായുള്ള ലയനം ഇതിന് കാരണമായി. 1991-ലെ പതിനായിരം കോടി രൂപ വിറ്റുവരവിൽ നിന്ന് 2011-12 കാലയളവിൽ 100.09 ബില്യൻ ഡോളറിന്റെ വർധനയാണ് ഉണ്ടായത്. ടാറ്റ മോട്ടോർസ്, ടാറ്റ സ്റ്റീൽ, ടാറ്റ കൺസൽട്ടൻസി സർവീസസ് തുടങ്ങി നിരവധി കമ്പനികളുടെ ചെയർമാനായിരുന്നു രത്തൻ ടാറ്റ.
ഉപ്പുമുതൽ ആർട്ടിഫിഷ്യൽ ഇന്റലിജൻസ് വരെ നീളുന്ന വ്യവസായ സാമ്രാജ്യം കെട്ടിപ്പടുക്കുന്നതിന് രത്തൻ ടാറ്റ തന്റെ ജീവിതം തന്നെ നിക്ഷേപമാക്കി. കാലാനുസൃതമായി ബിസിനസ് തന്ത്രങ്ങൾ നവീകരിച്ച അദ്ദേഹം, സ്റ്റാർട്ടപ്പുകളിൽ നിക്ഷേപിച്ച് വൻ നേട്ടമുണ്ടാക്കാനും മറന്നില്ല. അതിസമ്പന്നരുടെ പട്ടികയിൽ ഇടംപിടിക്കുന്നതിനേക്കാൾ സുസ്ഥിര വളർച്ചയ്ക്കാണ് രത്തൻ ടാറ്റ പ്രാധാന്യം നൽകിയത്. വ്യവസായത്തിനപ്പുറം മനുഷ്യത്വത്തിന്റെ മുഖം കൂടിയുണ്ടായിരുന്ന അദ്ദേഹം, ലാഭത്തിന്റെ വലിയൊരു ശതമാനം സന്നദ്ധ പ്രവർത്തനങ്ങൾക്ക് മാറ്റിവച്ചു.
Story Highlights: Ratan Tata transformed Tata Group into a global conglomerate during his tenure from 1991 to 2012
