മുഖ്യമന്ത്രി പിണറായി വിജയൻ ഇന്നും നിയമസഭയിൽ എത്തിയില്ല. ആരോഗ്യപരമായ കാരണങ്ങളാൽ സഭയിലെത്താൻ കഴിയാത്തതായി മുഖ്യമന്ത്രിയുടെ ഓഫീസ് വിശദീകരിച്ചു. പനിയെ തുടർന്ന് ഡോക്ടർമാർ മുഖ്യമന്ത്രിക്ക് പരിപൂർണ വിശ്രമം നിർദേശിച്ചിട്ടുണ്ട്. ഇതിനാൽ അടിയന്തര പ്രമേയത്തിന് നേരിട്ട് മറുപടി നൽകാനും സാധിക്കില്ല.
ഇന്നലെയും മുഖ്യമന്ത്രി അടിയന്തര പ്രമേയ ചർച്ചയിൽ നിന്ന് വിട്ടുനിന്നിരുന്നു. തൊണ്ട വേദനയും പനിയുമുള്ളതിനാലാണ് അന്ന് വിട്ടുനിന്നതെന്ന് വിശദീകരിച്ചിരുന്നു. ഡോക്ടർമാർ വോയ്സ് റെസ്റ്റ് നിർദേശിച്ചതായും മുഖ്യമന്ത്രിയുടെ ഓഫീസ് അറിയിച്ചു. മുഖ്യമന്ത്രിയുടെ അസാന്നിധ്യം ചർച്ചയ്ക്കിടെ പ്രതിപക്ഷം ഉന്നയിക്കുകയും ചെയ്തിരുന്നു.
അതേസമയം, നിയമസഭയിൽ പ്രത്യേക സീറ്റ് അനുവദിച്ചതോടെ പിവി അൻവർ എംഎൽഎ ഇന്ന് നിയമസഭയിലെത്തി. പ്രതിപക്ഷ നിരയോട് ചേർന്ന് നാലാം നിരയിൽ എകെഎം അഷ്റഫ് എംഎൽഎയ്ക്ക് അടുത്താണ് അൻവറിന് ഇരിപ്പിടം നൽകിയിരിക്കുന്നത്.
Story Highlights: Kerala Chief Minister Pinarayi Vijayan absent from assembly due to health issues, doctors advise complete rest
