വനിത ട്വന്റി ട്വന്റി ലോകകപ്പില്‍ ഇന്ത്യയും പാകിസ്താനും തമ്മിലുള്ള മത്സരത്തില്‍ പാകിസ്താന്‍ ഇന്ത്യക്ക് 106 റണ്‍സിന്റെ വിജയ ലക്ഷ്യം നല്‍കി. ടോസ് നേടി ബാറ്റിംഗ് തെരഞ്ഞെടുത്ത പാകിസ്ഥാന്‍ 20 ഓവറില്‍ 8 വിക്കറ്റ് നഷ്ടത്തില്‍ 105 റണ്‍സ് നേടി. ഇന്ത്യന്‍ ബൗളര്‍മാരുടെ മികച്ച പ്രകടനമാണ് പാകിസ്താന്റെ സ്കോര്‍ നിയന്ത്രിക്കാന്‍ സഹായിച്ചത്.
അരുന്ധതി റെഡ്ഡി മൂന്ന് വിക്കറ്റും ശ്രേയങ്ക പാട്ടീല്‍ രണ്ട് വിക്കറ്റും നേടി. മലയാളി താരം ആശ ശോഭന, രേണുക സിങ്, ദീപ്തി ശര്‍മ്മ എന്നിവര്‍ ഓരോ വിക്കറ്റ് വീതം എടുത്തു. പാകിസ്താന്‍ നിരയില്‍ നിദ ദര്‍ (28 റണ്‍സ്), മുനീബ അലി (17 റണ്‍സ്), ക്യാപ്റ്റന്‍ ഫാത്തിമ സന (13 റണ്‍സ്), സെയ്ദ അരൂപ് ഷാ (14 റണ്‍സ്) എന്നിവരാണ് പ്രധാന സ്കോറര്‍മാര്‍.
ഇന്ത്യന്‍ ടീമില്‍ മലയാളി താരം സജന സജീവന്‍ ആദ്യ ഇലവനിലെത്തിയത് കേരളത്തിന് സന്തോഷം നല്‍കി. വനിതാ ടി20 ലോകകപ്പില്‍ കളിക്കുന്ന രണ്ടാമത്തെ മലയാളി താരമാണ് സജ്‌ന. ആശ ശോഭനയാണ് മറ്റൊരു മലയാളി താരം. പാകിസ്താന്റെ തുടക്കം പതറിയായിരുന്നു, ആദ്യ ഓവറില്‍ തന്നെ റണ്‍സൊന്നുമില്ലാതെ ഗുല്‍ ഫെറോസയെ നഷ്ടമായി. രേണുക സിങിനായിരുന്നു ആദ്യ വിക്കറ്റ്.
Story Highlights: India set target of 106 runs by Pakistan in Women’s T20 World Cup match
