വിസ്മയകരമായ ‘ഷുചിൻഷൻ’ അറ്റ്ലാസ് വാൽനക്ഷത്രം ഭൂമിയുടെ ദൃഷ്‌ടിപഥത്തിൽ എത്തിയിരിക്കുന്നു. 80,000 വർഷങ്ങൾക്കുശേഷം ആദ്യമായാണ് ഈ വാൽനക്ഷത്രം ഭൂമിയുടെ ഭ്രമണപഥംവഴി കടന്നുപോകുന്നത്. കിഴക്കൻ ചക്രവാളത്തിൽ രണ്ടാഴ്ചക്കാലം സൂര്യോദയത്തിനുമുമ്പ് ഈ അപൂർവ അതിഥിയെ കാണാനാവും. ഭൂമിയിൽനിന്ന് 11 കോടി കിലോമീറ്റർ അകലത്തിലൂടെയാണ് സഞ്ചാരമെങ്കിലും വരുംദിവസങ്ങളിൽ തിളക്കമേറും.
ടെലിസ്കോപ്പോ ബൈനോക്കുലറോ ഉപയോഗിച്ചാൽ കൂടുതൽ വ്യക്തതയോടെ വാൽനക്ഷത്രത്തെ കാണാനാവും. 14നുശേഷം പടിഞ്ഞാറൻ ചക്രവാളത്തിൽ സൂര്യാസ്തമനത്തിന് ശേഷമായിരിക്കും ഇതിനെ കാണുക. ചൊവ്വാഴ്ച പുലർച്ചെ തിരുവനന്തപുരത്ത് വാൽനക്ഷത്രം ദൃശ്യമായി. ഐഎസ്ആർഒ കേന്ദ്രമായ വലിയമല എൽപിഎസ്‌സിയിലെ ശാസ്ത്രജ്ഞരായ കിരൺമോഹനനും ഫഹദ്ബിൻ അബ്‌ദുൾ ഹസീസും ദൃശ്യങ്ങൾ പകർത്തി.
പ്രകാശവർഷം അകലെയുള്ള ഊർട്ട് മേഘത്തിൽനിന്നാണ് ഈ വാൽനക്ഷത്രത്തിന്റെ വരവ്. ചൈനയിലെ പർപ്പിൾ മൗണ്ടൻ ഒബ്‌സർവേറ്ററിയിലെ ഗവേഷകർ കഴിഞ്ഞവർഷം ജനുവരി ഒമ്പതിനാണ് ഈ വാൽനക്ഷത്രത്തെ ആദ്യം കണ്ടെത്തിയത്. ഹവായിലെ അറ്റ്ലാസ് നിരീക്ഷണ സംവിധാനം ഫെബ്രുവരിയിൽ ഇത് സ്ഥിരീകരിച്ചു.
Story Highlights: Rare ‘Shuchinshan’ Atlas comet visible in Earth’s sky after 80,000 years, observable in eastern and western horizons
