ന്യൂയോർക്കിലെ ഐക്യരാഷ്ട്രസഭയുടെ പൊതുസഭയിൽ പാക്കിസ്ഥാൻ പ്രധാനമന്ത്രി ഷഹബാസ് ഷെരീഫ് ജമ്മു കാശ്മീർ വിഷയം ഉന്നയിച്ചതിന് ഇന്ത്യ ശക്തമായ മറുപടി നൽകി. ഇന്ത്യൻ പ്രതിനിധി ഭാവിക മംഗളാനന്ദൻ, ഷെരീഫിന്റെ നിലപാട് അപഹാസ്യവും കാപട്യം നിറഞ്ഞതുമാണെന്ന് വ്യക്തമാക്കി. ജമ്മു കാശ്മീരിൽ ഹിത പരിശോധന നടത്തണമെന്നും ഇന്ത്യ ചർച്ചയ്ക്ക് തയ്യാറാകണമെന്നുമുള്ള പാക്കിസ്ഥാന്റെ ആവശ്യത്തെ ഭാവിക തള്ളിക്കളഞ്ഞു.
കശ്മീരിൽ അക്രമം നടത്തുന്ന ഭീകരരെ മഹത്വവത്ക്കരിക്കുകയാണ് പാക് പ്രധാനമന്ത്രി ചെയ്തതെന്ന് ഭാവിക ചൂണ്ടിക്കാട്ടി. അതിർത്തി കടന്നുള്ള ഭീകരവാദം ഇന്ത്യ നേരിടുമെന്നും അവർ വ്യക്തമാക്കി. പാർലമെന്റിൽ അടക്കം പാകിസ്താൻ ആക്രമണം നടത്തിയ രാജ്യമാണെന്നും, അത്തരമൊരു രാജ്യം അക്രമത്തെക്കുറിച്ച് സംസാരിക്കുന്നത് കാപട്യത്തിന്റെ അങ്ങേയറ്റമാണെന്നും ഭാവിക കൂട്ടിച്ചേർത്തു.
ജമ്മു കശ്മീർ ഇന്ത്യയുടെ അവിഭാജ്യവും ഒഴിവാക്കാനാകാത്ത ഭാഗവുമാണെന്ന് ഭാവിക ഊന്നിപ്പറഞ്ഞു. പാകിസ്താന്റെ യഥാർത്ഥ ആഗ്രഹം ഈ പ്രദേശം സ്വന്തമാക്കുക എന്നതാണെന്നും, ജമ്മുകശ്മീരിലെ തിരഞ്ഞെടുപ്പ് തടസ്സപ്പെടുത്താൻ പാകിസ്താൻ നിരന്തരം ശ്രമിച്ചുവെന്നും അവർ ആരോപിച്ചു. അട്ടിമറിക്കപ്പെട്ട തിരഞ്ഞെടുപ്പുകളുടെ ചരിത്രമുള്ള ഒരു രാജ്യം രാഷ്ട്രീയ തിരഞ്ഞെടുപ്പുകളെക്കുറിച്ച് സംസാരിക്കുന്നത് അസാധാരണമാണെന്നും ഭാവിക കുറ്റപ്പെടുത്തി. ഭാവികയുടെ മറുപടിയുടെ വീഡിയോ ദൃശ്യം സോഷ്യൽ മീഡിയയിൽ വൈറലായിട്ടുണ്ട്.
Story Highlights: Indian diplomat Bhavika Mangalanandan strongly rebuts Pakistani PM Shehbaz Sharif’s statements on Kashmir at UNGA
