ദുബായ് മിറാക്കിൾ ഗാർഡൻ വീണ്ടും സന്ദർശകർക്കായി തുറന്നിരിക്കുകയാണ്. ലോകത്തിന്റെ വിവിധ ഭാഗങ്ങളിൽ നിന്നുള്ള സന്ദർശകരെ സ്വാഗതം ചെയ്യാൻ പൂന്തോട്ടത്തിലെ ചെടികളെല്ലാം പൂത്തുലഞ്ഞു നിൽക്കുന്നതായി അധികൃതർ അറിയിച്ചു. 13-ാം പതിപ്പിലും വൈവിധ്യമാർന്ന കാഴ്ചകളാണ് ഒരുക്കിയിരിക്കുന്നത്. അഞ്ച് ലക്ഷത്തിലേറെ പുഷ്പങ്ങളും സസ്യങ്ങളും കൊണ്ട് നിർമിച്ച എമിറേറ്റ്സ് എ380-ന്റെ ഗിന്നസ് വേൾഡ് റെക്കോർഡ് രൂപമാണ് ഇവിടുത്തെ ഏറ്റവും വലിയ ആകർഷണങ്ങളിലൊന്ന്.
യുഎഇയിലെ താമസക്കാർക്ക് മുൻവർഷത്തേക്കാൾ അഞ്ച് ദിർഹം കുറവാണ് ഇക്കുറി പ്രവേശന നിരക്ക്. എമിറേറ്റ്സ് ഐഡി കാണിച്ച് മുതിർന്നവർക്കും കുട്ടികൾക്കും 60 ദിർഹത്തിന് പാർക്കിൽ പ്രവേശിക്കാം. മൂന്ന് വയസ്സിന് താഴെയുള്ള കുട്ടികൾക്ക് സൗജന്യ പ്രവേശനമാണ്. എന്നാൽ വിനോദസഞ്ചാരികൾക്കും യുഎഇയ്ക്ക് പുറത്തെ താമസക്കാർക്കും ടിക്കറ്റ് നിരക്ക് 5 ദിർഹം കൂട്ടി. മുതിർന്നവർക്ക് 100 ദിർഹവും കുട്ടികൾക്ക് 85 ദിർഹവുമാണ് പുതിയ നിരക്ക്.
തിങ്കൾ മുതൽ വെള്ളി വരെ ദിവസവും രാവിലെ 9 മുതൽ രാത്രി 9 വരെയാണ് പാർക്ക് പ്രവർത്തിക്കുക. വാരാന്ത്യങ്ങളിലും പൊതു അവധി ദിവസങ്ങളിലും രാത്രി 11 വരെ പാർക്ക് തുറന്നിരിക്കും. പാർക്കിലേക്കുള്ള പ്രവേശനത്തിനുള്ള ഓൺലൈൻ ബുക്കിങ് നാളെ മുതൽ ആരംഭിക്കും. പുഷ്പങ്ങളുടെ വിസ്മയലോകമായ ദുബായ് മിറാക്കിൾ ഗാർഡൻ സന്ദർശിക്കാൻ ഇനി എല്ലാവർക്കും അവസരമുണ്ട്.
Story Highlights: Dubai Miracle Garden reopens with new attractions and revised ticket prices for its 13th season
