തൃശ്ശൂര്‍പൂരം കലക്കിയ സംഭവത്തില്‍ ജുഡീഷ്യല്‍ അന്വേഷണം നടത്തണമെന്ന് കെപിസിസി പ്രസിഡന്റ് കെ.സുധാകരന്‍ എംപി ആവശ്യപ്പെട്ടു. പൊലീസ് ആസ്ഥാനത്ത് നിന്നും തൃശ്ശൂര്‍ സിറ്റി പോലീസില്‍ നിന്നും ലഭിച്ച വിവരാവകാശ രേഖകള്‍ പ്രകാരം അന്വേഷണം നടക്കുന്നതായി അറിവില്ലെന്നാണ് അറിയിച്ചിരിക്കുന്നത്. ഇതിലൂടെ അന്വേഷണം അട്ടിമറിക്കപ്പെട്ടെന്ന് വ്യക്തമാണെന്ന് സുധാകരന്‍ ആരോപിച്ചു.
മുഖ്യമന്ത്രിയും സിപിഎമ്മും ചേര്‍ന്ന് അന്വേഷണം നടക്കുന്നുണ്ടെന്ന് പറഞ്ഞ് കേരള ജനതയെ കബളിപ്പിക്കുകയായിരുന്നുവെന്നും, സര്‍ക്കാര്‍ നടത്തുന്ന അന്വേഷണത്തില്‍ ജനങ്ങള്‍ക്ക് വിശ്വാസമില്ലെന്നും സുധാകരന്‍ പറഞ്ഞു. പൊലീസ് മേധാവി ഒരാഴ്ചയ്ക്കുള്ളില്‍ റിപ്പോര്‍ട്ട് നല്‍കുമെന്ന് മുഖ്യമന്ത്രി പറഞ്ഞിരുന്നെങ്കിലും അഞ്ചുമാസം കഴിഞ്ഞിട്ടും അന്വേഷണം വെറും പ്രഖ്യാപനത്തില്‍ മാത്രം ഒതുങ്ങിയതായും അദ്ദേഹം ചൂണ്ടിക്കാട്ടി.
ബിജെപിയെ തൃശ്ശൂരില്‍ വിജയിപ്പിക്കാന്‍ സിപിഐഎമ്മും ആര്‍എസ്എസും നടത്തിയ ഗൂഢാലോചനയുടെ നേര്‍ചിത്രമാണ് വിവരാവകാശ രേഖകളിലൂടെ പുറത്തുവന്നതെന്ന് സുധാകരന്‍ ആരോപിച്ചു. ആര്‍എസ്എസ് ബന്ധമുള്ള എഡിജിപിയെ അന്വേഷണ ചുമതല ഏല്‍പ്പിച്ചതും അന്വേഷണം അട്ടിമറിക്കാനാണെന്നും അദ്ദേഹം പറഞ്ഞു. കേന്ദ്ര ഏജന്‍സികളുടെ അന്വേഷണത്തില്‍ നിന്ന് രക്ഷപ്പെടാനാണ് മുഖ്യമന്ത്രി ഇത്തരം നടപടികള്‍ സ്വീകരിക്കുന്നതെന്നും സുധാകരന്‍ ആരോപിച്ചു.
Story Highlights: KPCC President K Sudhakaran demands judicial probe into Thrissur Pooram controversy, alleges CPM-RSS conspiracy
