സൂര്യയെ നായകനാക്കി പ്രശസ്ത സംവിധായകന്‍ ശിവ ഒരുക്കിയ ബ്രഹ്‌മാണ്ഡ ചിത്രം ‘കങ്കുവ’യുടെ റിലീസ് തീയതി പ്രഖ്യാപിച്ചു. 350 കോടി രൂപ ബജറ്റില്‍ ഒരുക്കിയ ഈ പിരീഡ് ആക്ഷന്‍ ഡ്രാമ നവംബര്‍ 14ന് ആഗോളവ്യാപകമായി 38 ഭാഷകളില്‍ തിയേറ്ററുകളിലെത്തും. കേരളത്തില്‍ ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ ചിത്രം വന്‍ റിലീസായി എത്തിക്കും.
ചിത്രം രണ്ട് ഭാഗങ്ങളായാണ് ഒരുക്കുന്നത്. 1500 വര്‍ഷങ്ങള്‍ക്ക് മുന്‍പ് നടക്കുന്ന കഥയാണ് ചിത്രത്തില്‍ പറയുന്നത്. ബോളിവുഡ് താരം ബോബി ഡിയോള്‍ വില്ലനായും ദിഷാ പഠാനി നായികയായും എത്തുന്നു. യോഗി ബാബു, പ്രകാശ് രാജ്, കെ എസ് രവികുമാര്‍, ജഗപതി ബാബു, ഹാരിഷ് ഉത്തമന്‍ തുടങ്ങിയവരാണ് മറ്റ് പ്രധാന താരങ്ങള്‍.
സ്റ്റുഡിയോ ഗ്രീനിന്റെ ബാനറില്‍ കെ ഇ ജ്ഞാനവേല്‍ രാജയും യു വി ക്രിയേഷന്‍സിന്റെ ബാനറില്‍ വംശി പ്രമോദും ചേര്‍ന്നാണ് ചിത്രത്തിന്റെ നിര്‍മ്മാണം. മദന്‍ കര്‍ക്കി, ആദി നാരായണ, സംവിധായകന്‍ ശിവ എന്നിവര്‍ ചേര്‍ന്നാണ് തിരക്കഥ രചിച്ചിരിക്കുന്നത്. വെട്രി പളനിസാമിയുടെ ഛായാഗ്രഹണവും ദേവിശ്രീ പ്രസാദിന്റെ സംഗീതവും ചിത്രത്തിന്റെ മറ്റ് പ്രധാന ആകര്‍ഷണങ്ങളാണ്.
Story Highlights: Suriya’s epic film ‘Kanguva’ directed by Siva to release globally in 38 languages on November 14
