പി.വി അന്‍വര്‍ എംഎല്‍എ പൊലീസ് സംരക്ഷണം ആവശ്യപ്പെട്ട് സംസ്ഥാന പോലീസ് മേധാവിക്ക് കത്ത് നല്‍കി. തന്റെ വീടിനും സ്വത്തിനും സംരക്ഷണം വേണമെന്നാണ് അദ്ദേഹത്തിന്റെ ആവശ്യം. തന്നെ കൊലപ്പെടുത്താനും കുടുംബാംഗങ്ങളെ അപായപ്പെടുത്താനും സാധ്യതയുണ്ടെന്ന് കത്തില്‍ പറയുന്നു. ഭീഷണി കത്ത് ലഭിച്ചതായും ജീവഭയമുണ്ടെന്നും കാണിച്ചാണ് അദ്ദേഹം സംരക്ഷണം ആവശ്യപ്പെട്ടിരിക്കുന്നത്. ഭീഷണി കത്തിന്റെ പകര്‍പ്പും പരാതിക്കൊപ്പം നല്‍കിയിട്ടുണ്ട്.
സംസ്ഥാനത്തെ ഉന്നത പൊലീസ് ഉദ്യോഗസ്ഥര്‍ക്കെതിരെയുള്ള പരാതിയില്‍ ഡിജിപിക്ക് തെളിവുകള്‍ കൈമാറിയതായി പി.വി അന്‍വര്‍ മാധ്യമങ്ങളോട് പ്രതികരിച്ചു. എം.ആര്‍ അജിത് കുമാര്‍ ഇപ്പോഴും ക്രമസമാധാന ചുമതലയുള്ള എഡിജിപിയായി തുടരുന്നതിനാലാണ് കൂടുതല്‍ തെളിവുകള്‍ കിട്ടാത്തതെന്ന് അദ്ദേഹം ആരോപിച്ചു. ഒരു മാസം കൊണ്ട് അന്വേഷണം പൂര്‍ത്തിയാക്കാനാകില്ലെന്നും, അന്വേഷണത്തിലൂടെ കുറ്റങ്ങള്‍ തെളിഞ്ഞാല്‍ കുറ്റക്കാര്‍ക്കെതിരെ സര്‍ക്കാര്‍ നടപടി സ്വീകരിക്കുമെന്ന് പ്രതീക്ഷിക്കുന്നതായും അന്‍വര്‍ കൂട്ടിച്ചേര്‍ത്തു.
സംസ്ഥാന പോലീസ് തലപ്പത്തെ രണ്ടാമനായ ഉദ്യോഗസ്ഥനെ ചോദ്യം ചെയ്യുന്ന അപൂര്‍വ സംഭവമാണ് പൊലീസ് ആസ്ഥാനത്ത് നടന്നത്. ഭരണകക്ഷി എം.എല്‍.എയുടെ പരാതിയിലാണ് ഇത് സംഭവിച്ചത്. മലപ്പുറത്തെ സ്വര്‍ണംപിടിക്കല്‍, റിദാന്‍ കൊലപാതകം, വ്യവസായിയായ മാമി തിരോധാനക്കേസ്, ഫോണ്‍ ചോര്‍ത്തല്‍, തൃശൂര്‍ പൂരം കലക്കല്‍, കവടിയാറിലെ കെട്ടിടനിര്‍മാണം തുടങ്ങിയ ആരോപണങ്ങളെല്ലാം നാല് മണിക്കൂറോളം നീണ്ട മൊഴിയെടുപ്പില്‍ ഡിജിപി ചോദ്യങ്ങളായി ഉന്നയിച്ചു. അജിത്കുമാറിന്റെ മറുപടിയും ഇതുവരെ ശേഖരിച്ച തെളിവുകളും വിലയിരുത്തി അടുത്ത ആഴ്ചയോടെ ഡിജിപി റിപ്പോര്‍ട്ട് നല്‍കുമെന്നാണ് പ്രതീക്ഷിക്കുന്നത്.
Story Highlights: MLA PV Anwar seeks police protection amid death threats and allegations against top police officials
